आसन्न प्रतिनिधिसभा र प्रदेशसभा निर्वाचनका लागि सीट बाँडफाँड गर्न बसेको सत्ता गठबन्धनको बैठकमा बिहीवार सहमतिको सम्भावना क्षीण बनेको छ ।

बिहीवार राति १० बजे (यो समाचार तयार पार्दा)सम्म बैठक जारी रहेको र आजै सहमति हुने सम्भावना कम रहेको बालुवाटार स्रोतले लोकान्तरलाई जानकारी दियो ।

'अहिलेसम्म बैठक जारी छ,' स्रोतले लोकान्तरसँग भन्यो, 'आजै निर्णय हुने सम्भावना कम छ । भोलि फेरि बैठक बसेर सहमतिलाई अन्तिम रूप दिने तयारी छ ।'

विशेष गरी उपेन्द्र यादव नेतृत्वको जनता समाजवादी पार्टी (जसपा)को डबल स्ट्यान्डर्डका कारण सत्ता गठबन्धनलाई सहमतिमा पुग्न कठिन बनेको हो ।

जसपाका नेताहरू सत्ता गठबन्धनको बैठकमा पनि सहभागी छन् भने अध्यक्ष उपेन्द्र यादवले सोही समयमा एमाले अध्यक्ष ओलीसँग वार्ता गरेका छन् ।

एमाले स्रोतका अनुसार जसपासँगको वार्ता सहमति नजिक छ । जसपालाई मधेशमा १६ र अन्य प्रदेशमा ८ गरी २४ सीट दिन एमाले तयार भएको छ ।

एमालेसँग सहमतिको नजिक पुगे पनि जसपाले सत्ता गठबन्धनसँगको छलफललाई पनि जारी राखेको छ ।

जसपा एमालेतिर गएमा बाँकी ४ दललाई केही थपेर सीट बाँडफाँड गर्नुपर्ने हुनसक्छ ।

अर्कातर्फ मधेश केन्द्रित अर्को दल लोकतान्त्रिक समाजवादी पार्टी (लोसपा)लाई सामेल गराउने विषय समेत प्रवेश गर्न सक्ने स्रोतको दाबी छ ।