घनश्याम भुसालप्रति ओलीको टिप्पणी – टिकटका लागि बस्नु भएको रहेछ, एमालेप्रति लगाव रहेन होला

नेकपा एमालेका अध्यक्ष केपी शर्मा ओलीले हालसालै पार्टी परित्याग गरेका स्थायी कमिटी सदस्य घनश्याम भुसाल टिकटकै लागि पार्टीमा बसेको प्रमाणित भएको टिप्पणी गरेका छन् । ९ लाख पार्टी सदस्यमध्ये एकाधले पार्टी छाड्नु वैयक्तित स्वतन्त्रताको विषय भएको उनले टिप्पणी गरे । 

प्राइम टेलिभिजनमा सोमवार राति प्रसारित एक अन्तवार्तामा ओलीले एमालेप्रति लगाव नरहेर पार्टी परित्याग गरेको आरोप लगाएका हुन् । ‘एमालेमा टिकटका लागि बस्नु भएको रहेछ, हामी बलिदानको बाटो लिएर बसेका हौँ, टिकटको परिकल्पना थिएन । भूमिगत कालमा टिकटको सपना र सम्भावना देखेका थिएनौँ’, ओलीले भने, ‘आवेशमा परित्याग गरेको हुनसक्छ, एमालेप्रति उहाँलाई लगाव रहेन होला । अर्को कुरा वैयक्तित स्वतन्त्रता पनि हो । ९ लाखमध्ये एकाधले छाड्नु ठूलो विषय बनाउनु हुँदैन ।’

पार्टी अध्यक्ष केपी ओलीको दम्भ र स्वेच्छचारिताको कैदी हुन पुगेको भन्दै भुसालले असोज २२ गते एमाले परित्यागको घोषणा गरेका थिए । एमालेबाट टिकट नपाएका भुसालले रुपन्देही १ बाट स्वतन्त्र उम्मेदवारी दिएका छन् ।