– ‘दुई नम्बरी’ फिल्मले एक सातामा गर्‍यो साढे चार करोड ग्रस कलेक्सन ।
–    ‘प्रेम गीत ३’ले नेपालबाट मात्रै कमायो १३ करोड २६ लाख ।

पछिल्लो समय चलेका नेपाली चलचित्रको कलेक्सनको खबर हुन् यी । चलचित्रले करोडौं ‘ग्रस कलेक्सन’ गरेको खबर सार्वजनिक भइरहँदा धेरैको बुझाइ हुनसक्छ, निर्माताले यति धेरै कमाएछन् । कलेक्सन सुनेर वास्तविकता नबुझी चलचित्रमा लगानी गर्नेहरु समेत प्रशस्तै हुने गरेका छन् । तर, चलचित्रले गरेको कलेक्सनमध्ये निर्माताको हातसम्म आधा रकम पनि आउँदैन । 

वितरक मनोज राठीका अनुसार चलचित्रको व्यापारमा सबैभन्दा पहिले १८ प्रतिशत कर दिनुपर्ने हुन्छ । ‘१३ प्रतिशत भ्याट र ५ प्रतिशत स्थानीय कर तिर्नुपर्छ’, राठीले लोकान्तरसँग भने, ‘१८ प्रतिशत घटाउँदा ८२ हुन्छ । त्यो प्रदर्शक र निर्माताबीच आधा–आधा अर्थात ५०/५० प्रतिशत बाँडफाँट हुन्छ ।’ 

यसरी हुन्छ हिसाब 

यदि कुनै चलचित्रले १ करोड कलेक्सन गर्‍यो भने १८ लाख राज्यलाई कर नै दिनुपर्ने हुन्छ । बाँकी ८२ लाखमा प्रदर्शक र निर्मातालाई ४१÷४१ लाख रुपैयाँ हुन आउँछ । यद्यपि, निर्माताले ५० प्रतिशत शेयर पाउने प्रदर्शनको पहिलो र दोस्रो हप्ता हो । तेस्रो हप्तादेखि भने निर्माताको भागमा ३५ प्रतिशत रकम मात्र आउने गरेको वितरकहरू बताउँछन् । यसमा केही कमिसन निर्माताले चलचित्र वितरकहरूलाई समेत छुट्याउनुपर्ने हुन्छ । 

वितरक करण श्रेष्ठका अनुसार निर्माताको भागमा परेको रकमबाट वितरकलाई ५ देखि १५ प्रतिशतसम्म शेयर बाँड्ने गरिएको छ । यसरी हेर्दा चलचित्रले १ करोड कलेक्सन गर्दा निर्माताको हातमा ३५ देखि ४० लाख रुपैयाँ आउने गरेको वितरक श्रेष्ठले बताए । 

चलचित्रले १० करोड व्यापार गर्दा निर्माताको हातमा ३ करोड ५० लाखदेखि ४ करोड रुपैयाँसम्म मात्रै आउने उनले बताए । ‘प्रेम गीत ३’ले नेपालमा तीन सातामा गरेको कलेक्सन १३ करोड २६ लाखलाई ३५ देखि ४० प्रतिशतमा हिसाव गर्दा निर्माताको हातमा ५ करोड रुपैयाँ हाराहारी पर्न जाने देखिन्छ । यद्यपि, यो चलचित्र चौंथो सातामा प्रदर्शनरत भएकाले निर्माताको हातमा अझै केही रकम हलबाट शेयर आउने देखिन्छ ।

त्यस्तै, ‘दुई नम्बरी’ले पहिलो साता साढे चार करोड ग्रस कलेक्सन गर्दा यसका निर्माताको हातमा बढीमा १ करोड ८० लाख हाराहारी पर्न जाने देखिन्छ । यो चलचित्र यतिबेला उल्लेखनीय दर्शकहरूको साथ दोस्रो सातामा प्रदर्शनरत छ । दोस्रो सातामा पनि चलचित्रले राम्रो व्यापार गर्ने देखिएको छ ।