नेकपा एमालेका नेता भीमबहादुर रावलले पार्टी अध्यक्ष केपी ओलीप्रति कटाक्ष गरेका छन् । आगामी मंसिर ४ गते हुने प्रतिनिधि सभा र प्रदेश सभा निर्वाचनमा टिकटबाट बन्चित गरिएका रावलले अध्यक्ष ओलीले के मात्र गर्न बाँकी राख्छन् होला र ? भन्ने प्रश्न गरेका छन् । 

बिहीवार सामाजिक सञ्जालमा सन्देश लेख्दै उनले दुर्नाम संस्था होलिवाइन भनी चिनिने एकनाथ ढकाललाई सांसद बनाउने गलत निर्णय उदांगिएपछि त्यसको दोष आफूमाथि लगाएको बताएका छन् । 

रावलले ट्वीटरमा लेखेका छन्, ‘दुर्नाम संस्थाका होलिवाइन भनी चिनिने एकनाथ ढकाललाई प्रतिनिधि सभा सदस्य बनाउने गलत निर्णय उदांगो भएपछि एमाले अध्यक्ष केपीले होलिवाइनको प्रचारक भीम रावल भन्नु भएछ । यस्तो भन्नसक्नेले अरू के मात्रै गर्न बाँकी राख्छन् होला र ? राजनीति विकृत त्यसै भएको हो र !’ 

एमालेले समानुपातिक उम्मेदवारको सूचीमा नेपाल परिवार दलका अध्यक्ष एकनाथ ढकालको नाम राखेका छन् । उक्त विषयले चर्चा पाइरहेको छ । एक सञ्चारमाध्यमले समानुपातिक उम्मेदवारको सूचीका विषयमा सोधेको प्रश्नमा ओलीले होलिवाइनको प्रचारक भीम रावल बनेको बताएका थिए । 

ढकाल आबद्ध एक संस्थाले केही वर्षपहिले काठमाडौंमा सबैजसो दलका प्रमुख नेताहरूलाई बोलाएर एक कार्यक्रम गरेको थियो । त्यसमा नेताहरूलाई ‘होलिवाइन’ खुवाइको थियो । तत्कालीन प्रधानमन्त्री ओलीले उक्त कार्यक्रम उद्घाटन गरेका थिए । इसाई धर्मको प्रचारका लागि आयोजना गरिएको कार्यक्रममा सहभागी भएपछि नेताहरूको चर्को आलोचना भएको थियो । उक्त कार्यक्रमको संयोजन ढकाल आफैले गरेका थिए ।