नेकपा एमालेका प्रदेश सभा उम्मेदवार भोजप्रसाद श्रेष्ठले बुटवलको विकास र जनताको सेवाबाहेक आफूले केही नसोचेको बताएका छन् । रुपन्देही–२ (२) का उम्मेदवार श्रेष्ठले आफूले यसअघि गरेका कामलाई जनताले देखिरहेको बताउँदै बुटवलबासीले निस्पक्ष मूल्याङकन गर्ने दाबी गरे । 

बुटवलमा सञ्चारकर्मीहरूसँगको भेटघाटमा बोल्दै एमाले प्रदेश उपाध्यक्षसमेत रहेका नेता श्रेष्ठले बुटवलको समस्याप्रति आफू जानकार रहेको बताउँदै जनताको मनोभावनालाई छोएर बुटवललाई आर्थिक र सांस्कृतिक केन्द्रको रूपमा विकास गर्न जुट्ने बताए । 

‘यहाँ विकासका ठूलो पूर्वाधारहरू बनिसकेका छन’, उम्मेदवार श्रेष्ठले भने, ‘नेपालकै पुरानोमध्येको व्यापारिक केन्द्र बुटवलका समस्यालाई दीर्घकालीन रूपमा समाधान गर्दै आर्थिक र सांस्कृति राजधानीको रूपमा विकास गर्ने मेरो योजना छ ।’ उम्मेदवार श्रेष्ठले बुटवलका अधुरा योजनालाई पूरा गर्ने दायित्व आफ्नो रहेको बताए । 

‘ठूला योजनालाई खबरदारी र प्रभावकारी अनुगमनको खाँचो छ’, श्रेष्ठले भने, ‘मेरो काम गर्ने सक्ने इच्छाशक्ति छ । त्यसको लागि मिडियाका साथीहरूको पनि साथ र पूर्ण सहयोगको अपेक्षा गरेको छ । बुटवललाई बनाउने दायित्व तपाईं हामी सबैको हो ।’ केही ठूला योजनाहरू कानूनी बाध्यताले प्रभावकारी रूपमा अगाडि बढ्न सकेका छैनन् । त्यस्तै शिक्षा, स्वास्थ्य र रोजगारको क्षेत्रमा अझै काम गर्न बाँकी रहेको उनको भनाइ छ । 

श्रेष्ठले बुटवलमा अब मानवीय विकास गर्न पनि लाग्नुपर्ने बताए । बुटवलको मेयर हुँदा पनि आफू बुटवललाई विकासको गतिमा अगाडि बढाएको कुरा बुटवलबासीलाई अवगत रहेको श्रेष्ठको भनाइ छ । 

श्रेष्ठ यस अघि २०७४ को प्रदेश सभा निर्वाचनमा पनि रुपन्देही २ (२) बाट फराकिलो मतान्तरले विजयी भएका थिए । उनी प्रदेश सभामा जनताका धेरै समस्या उठाउने नेतामा पर्छन् । शंकर पोखरेल नेतृत्वको सरकारका स्वास्थ्य तथा जनसंख्या मन्त्री भएर उनले निःशुल्क रगत, कोभिडकालमा अक्सिजन प्लान्ट स्थापनालगायतका क्षेत्रमा महत्वपूर्ण काम गरेका थिए ।