महोत्तरी जिल्ला सदरमुकाम जलेश्वर समेटिएको निर्वाचन क्षेत्र नम्बर ३ मा मंसिर ४ गते हुन लागेको प्रतिनिधिसभा निर्वाचनमा कडा प्रतिस्पर्धा हुने भएको छ । 

लोकतान्त्रिक समाजवादी पार्टी (लोसपा) नेपालका अध्यक्ष महन्थ ठाकुर पुनः महोत्तरी–३ बाट प्रतिनिधिसभा सदस्यको उम्मेदवारी दिएपछि सो क्षेत्रमा निर्वाचनको माहोल ह्वात्तै बढेको हो ।

उनी यसअघि विक्रम संवत् २०७४ सालको निर्वाचनमा पनि सोही क्षेत्रबाट चुनाव जितेका थिए । शुरूमा नेपाली कांग्रेस पार्टीमा लामो समय आवद्ध भए पनि पछिल्लो समय विशेष गरी मधेश केन्द्रित राजनीतिमा लागेका थिए ।

तत्कालीन समयमा उनले कांग्रेस परित्याग गर्दै आफ्नै नेतृत्वमा तराई–मधेश लोकतान्त्रिक पार्टी गठन गरेका थिए भने साविकको मधेशी जनअधिकार फोरम नेपालका अध्यक्ष उपेन्द्र यादवसँगै दोस्रो मधेश आन्दोलनको नेतृत्व गरेका थिए । ८ बुँदे सम्झौतापछि विक्रम संवत् २०६४ सालको पहिलो संविधानसभा चुनावमा भने उनी सर्लाहीबाट पराजित भएका थिए ।

२०७० सालको दोस्रो संविधानसभा चुनावमा पनि सर्लाही–४ बाट उनी पराजित भएका थिए । विक्रम संवत् २०७४ सालको निर्वाचनमा उनी महोत्तरी–३ बाट निर्वाचनमा होमिएको थिए भने २०७४ सालको प्रतिनिधिसभा निर्वाचनमा उनी १८ हजार १६९ मतको फराकिलो अन्तरले निर्वाचित भएका थिए । २६ हजार ८४५ मत ल्याएर उनी निर्वाचित हुँदा निकटतम् प्रतिद्वन्द्वी नेकपा एमालेका विजयकुमार चौधरीले ८ हजार ६७६ मत तथा स्वतन्त्र उम्मेदवार चन्देश्वर झाले ४ हजार २० मत मात्र ल्याएका थिए ।

उनलाई यसपटक जनता समाजवादी पार्टीका तर्फबाट पूर्व कृषिमन्त्री हरिनारायण यादव र एमालेबाट बागी बनेर स्वतन्त्र उम्मेदवारी दिएका रामआधार कापरले चुनौती थपेका छन् । क्षेत्र नम्बर ३ बाटै लोसपा नेपालका अध्यक्ष ठाकुरका सहयात्री तथा तत्कालीन तमलोपा पार्टीका वरिष्ठ उपाध्यक्ष समेत रहेका वृषेशचन्द्र लालले उम्मेदवारी दिएका छन् ।

महोत्तरी क्षेत्र नम्बर ३ मा ९९ हजार ९३० मतदाता छन् । स्थानीय तहको परिणामले पनि लोसपाभन्दा जसपा नै बलियो अवस्थामा रहेको देखिन्छ । यस क्षेत्रमा ५ वटा स्थानीय तह छन् । जलेश्वर, मनराशिसवा र मटिहानी नगरपालिका, एकडारा र पिपरा गाउँपालिकाका केही वडालाई समेटेर क्षेत्र विभाजन गरिएको छ ।

विक्रम संवत् २०७९ वैशाख ३० गते सम्पन्न भएको स्थानीय तहको निर्वाचनमा ती ५ पालिकामध्ये मटिहानीमा मात्र लोसपाले जीत हात पारेको छ ।