जनगणतन्त्र चीनको सत्तारूढ दल चिनियाँ कम्युनिस्ट पार्टीले गत साता २०औं राष्ट्रिय महाधिवेशन सम्पन्न गरेको छ । 

त्यस महाधिवेशनका विषयमा पश्चिमी सञ्चारमाध्यमहरूले धेरै किसिमका भ्रमपूर्ण कुराहरू फैलाएका छन् । ती भ्रमहरूलाई चिनियाँ विश्लेषक चाओ दाश्वाईले चिर्न प्रयास गरेका छन् । 

उनका अनुसार,

जनगणतन्त्र चीन स्थापना भएयता देशमा अहिलेसम्म ६ जना सर्वोच्च नेता बनेका छन् । ती हुन् : माओ चतोङ, ह्वा क्वोफङ, तङ स्याओपिङ, च्याङ चमिन, हु चिन्ताओ र सी चिनपिङ । तीमध्ये हु चिन्ताओले मात्र पश्चिमी सञ्चारमाध्यमले बनाएको भाष्य अर्थात् दुई कार्यकाल पूरा गरे । 

अनि पश्चिमाहरूले ६८ वर्षमा चिनियाँ नेताहरू रिटायर हुनुपर्ने नियम ल्याइएको कुरा झिके ।

चिनियाँ राजनीतिक प्रणालीमा अनुभव तथा वरिष्ठतालाई उच्च महत्त्व दिइन्छ । 

राष्ट्रिय नेतृत्वमा पुग्नुअघि नेताहरूले कम्तीमा ३० वर्ष काम गरेको अनुभव बटुल्नुपर्ने हुन्छ । 

त्यसैले उमेरहदको कुनै नियम छैन । 

हु चिन्ताओको कार्यकालमा नेताहरू स्वयंं ६८ वर्षको उमेरमा रिटायर भएका थिए । 

नयाँ सर्वोच्च नेताभन्दा वरिष्ठ कुनै पनि नेता पोलिटब्युरोमा रहन पाउँदैन । 

त्यसैले चिनियाँ नेतृत्वलाई पुस्ताका आधारमा वर्णन गरिन्छ । 

एउटा पुस्ताले अर्को पुस्तालाई अनुसरण गर्छ । पोलिटब्युरो नेताहरू आफूभन्दा उमेरले कान्छो सर्वोच्च नेता बनेमा स्वयं रिटायर हुन्छन् । 

त्यसैले सी सर्वोच्च नेता बन्दा हु प्रशासनका वरिष्ठ पोलिटब्युरो सदस्यहरू रिटायर भएका थिए । 

पश्चिमा सञ्चारमाध्यमहरूले चिनियाँ कम्युनिस्ट पार्टीमा गुट रहेको हल्ला पनि फिँजाए । अनि सी चिनपिङले पोलिटब्युरोमा आफ्ना बफादारहरूलाई ल्याएको उनीहरूले लेखे । 

सीलाई प्रिन्सलिङ गुट (अर्थात्, नेताको छोरा गुट) को दिस्य भएको भनियो । पार्टीमा नातावाद चल्छ भन्ने गलत भाष्य स्थापित गर्नका लागि पश्चिमी सञ्चारमाध्यमले भ्रम फैलाउन खोजेका थिए । 

पार्टीमा त्यस्तो कुनै गुट छैन । 

पश्चिमाहरू आफ्नै राजनीतिक प्रणाली चीनको प्रणालीमा थोपर्न चाहन्छन् । 

उनीहरूले भने जस्तो प्रिन्सलिङ गुट, तुआनपाई गुट वा शांघाई गुट पार्टीमा हुन्थ्यो भने सीको नेतृत्वमा रहेको नयाँ पोलिटब्युरोमा कारखानाका कामदार तथा किसानका छोराछोरी कसरी अट्थे ? 

पोलिटब्युरो सदस्यहरूमा कारखानाका मजदूरका छोरा, कृषकका छोरा, सरकारी कर्मचारीका छोरा, चिकित्सक र शिक्षकहरू छन् । 

प्रिन्सलिङ गुटले कामकाजी वर्गका छोराछोरीलाई पोलिटब्युरोमा किन राख्थ्यो होला ? 

केहीले सोध्लान्, अनि सी चिनपिङ गुट छैन त ? 

तिनीहरूलाई प्रतिप्रश्न :

जो बाइडनले आफ्नो प्रशासनमा किन कट्टर दक्षिणपन्थी रिपब्लिकनहरूलाई नराखेका त ?