नेपाल कम्युनिस्ट पार्टी (एमाले)का अध्यक्ष केपी शर्मा ओलीले चुनावी घोषणा पत्रमा गरिएका २० वटा ज्ञारेन्टी राष्ट्र बैंकले नोटमा गरेको ज्ञारेन्टीजस्तो भएको बताएका छन् । घोषणापत्रमा गरिएका कुराको भुक्तानी एमालेले गर्ने ओलीले बताए । 

मंगलवार काठमाडौंमा चुनावी घोषणापत्र सार्वजनिक गर्न आयोजित कार्यक्रममा बैंकर अनिल केशरी शाहसँगको ‘लाइभ डिबेट’का क्रममा ओलीले एमालेले घोषणापत्रमा गरेका प्रतिबद्धता उधारो नभएको बताएका हुन् ।

‘सबै पार्टीले चुनावमा घोषणापत्र जारी गरेका छन्, कार्यान्वयन गर्ने होइनन् । एमालेको घोषणापत्र बरफको डल्लो होइन हराएर जाओस् । मंसिर ४ – एमाले सरकार, हाम्रो विश्वास हो’, ओलीले भने, ‘गर्भनरले हस्ताक्षर गरेको नोटमा नेपाल राष्ट्र बैंकको भुक्तानी आएमा रु यति दिइनेछ भनेर लेखिएको हुन्छ, त्यो कागजको टुक्रा मात्र होइन । यो एउटा कागजको पिस होइन । सेन्ट्रल बैंकले जस्तै हरेक अक्षरको ज्ञारेण्टी हामी लिन्छौँ । घोषणापत्रमा गभर्नरको सिग्नेचर गरेर पठाएको छ । यसको भुक्तानी जनताले हामीसँग माग्न सक्छ, यसको भुक्तानी गर्न तयार छौँ ।’ 

एमालेले चुनावी घोषणापत्रमा आफ्नो नेतृत्वमा सरकार बने गर्ने २० ज्ञारेन्टीको सूची सार्वजनिक गरेको थियो ।