अहिले अमेरिकाका ठूला प्रविधि कम्पनीहरूले खर्च कटौतीका नाममा कर्मचारीहरूलाई निकालिरहेका छन् । यसले नेपालदेखि केन्यासम्मका मानिसलाई असर पारेको टाइम पत्रिकामा बिल्ली पेरिगोले लेखेका छन् ।

पेरिगोका अनुसार, सामाजिक सञ्जालको ठूलो कम्पनी मेटाले ११ हजार कर्मचारी निष्काशन गरेको घोषणा गरेको छ । त्यो भनेको कुल कर्मचारी संख्याको १३ प्रतिशत हो । 

गत अक्टोबर महिनामा इलोन मस्कले ट्विटर किनेपछि कम्पनीका लगभग ३ हजार कर्मचारी निकालेका छन् । त्यो भनेको कुल संख्याको आधा हो । 

त्यस्तै अमेजन कम्पनीले १० हजारभन्दा बढी कर्मचारी बर्खास्त गर्न खोजेको छ । माइक्रोसफ्ट, लिफ्ट र स्ट्राइपले पनि त्यसै गर्न खोज्दैछन् । 

यसले महिनाको एक लाख डलरभन्दा बढी कमाउने कोडरहरू मात्र प्रभावित भएका छैनन् । भूमण्डलीकृत अर्थतन्त्रका कारण नेपाल जस्ता विकासशील मुलुकमा रही अमेरिकी प्राविधिक कम्पनीहरूको काम लिएर केही डलर कमाउने नेपालीहरूलाई पनि यसले असर पारेको छ । 

अमेरिकी समकक्षीको तुलनामा थोरै मात्र कमाइ गर्ने उनीहरूलाई निष्काशनका कारण गरीबीको रेखामुनि धकेलिने डर छ ।

क्लाउडफ्याक्ट्री नामक आउटसोर्सिङ कम्पनीमा रहेका सयौं कर्मचारीमा नेपालीहरू पनि पर्छन् । त्यस कम्पनीका ६०० ग्राहकमध्ये माइक्रोसफ्ट पनि एक हो । क्लाउडफ्याक्ट्रीले नोभेम्बर ९ मा लगभग १२ प्रतिशत कर्मचारी कटौती गरेको थियो । 

निकालिएका कर्मचारीहरूलाई केही रकम दिइने भने पनि कति दिइने उसले खुलाएको छैन । 

नोभेम्बर १५ मा क्लाउडफ्याक्ट्रीको वेबसाइटमा उल्लेख भएअनुसार, नेपाल र केन्यामा उसका ७ हजारभन्दा बढी कर्मचारी छन् । 

नेपालको श्रम कानूनले कर्मचारीहरूलाई पर्याप्त संरक्षण गर्दैन । यहाँबाट क्लाउडफ्याक्ट्रीका लागि काम गर्ने धेरै कर्मचारी कटौतीमा परेपछि उनीहरूको बिचल्ली भएको छ ।