नेकपा एमालेका अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल प्रचण्डबीच टेलिफोन संवाद भएको छ ।

दुई नेताका बीच तिक्ततापूर्ण सम्बन्धरहेका बेला ओलीले फोन गरेर प्रचण्डलाई चुनाव जितेको बधाई दिएका छन् । 

ओली र प्रचण्डका बीचमा टेलिफोन संवाद भएको दुवै नेताका सचिवालयले पुष्टि गरेको छ । ओलीले विहीबार दिउँसो प्रचण्डलाई फोन गरेका थिए । 

संवादका क्रममा प्रचण्डले पनि चुनाव जितेकोमा ओलीलाई बधाई दिएका छन् । 

दुई नेताबीच चुनावी नतिजा आइसकेपछि आगामी दिनका अगाडि बढ्नेबारे बसेर कुराकानी गर्ने विषयमा कुरा भएको ओलीको सचिवालयले बताएको छ । 

प्रचण्डको सचिवालयका एक जना सदस्यले दिएको जानकारीअनुसार, मिलेर अघि जाने बारे गम्भिर भएर सोच्ने ओलीले प्रचण्डलाई आग्रह गरेका छन् । 

तत्कालिन नेकपा विभाजनपछि ओली र प्रचण्डकाबीचमा तिक्तापूर्ण सम्बन्ध थियो । ओलीले प्रचण्डलाई कांग्रेसलाई साथ दिएर कम्युनिष्ट आन्दोलन सिध्याउन लागि परेको भन्दै सार्वजनिक मञ्चहरूमा गाली बर्साउँथे भने प्रचण्डले ओलीलाई प्रतिगमनकारीको बिल्ला भिराउने गरेका थिए ।

तर, चुनावको नतिजा नआइसक्दै ओलीले प्रचण्डलाई फोन गरेर आगामी दिनमा मिलेर जाने बारे प्रस्ताव गरेका छन् ।

कम्युनिष्ट आन्दोलन सिध्याउन विभिन्न तत्वहरु सक्रिय रहेको र त्यसलाई चिनेर अघि बढ्नपर्ने वारे टेलिफोनमा संवाद भएको ओली र प्रचण्डका सचिवालय सहयोगीहरुले बताएका छन् । 

विहीबार दिउँसो प्रचण्डलाई भेट्न पुगेका नेताहरुसँग ओलीले कम्युनिष्ट आन्दोलनबारे चिन्ता व्यक्त गरेकोमा आफूलाई खुशी लागेको प्रचण्डले बताएको माओवादी केन्द्रका नेताहरुले बताएका छन् । 

ओलीले बुधबार साँझ निर्वाचन जितकोमा कांग्रेस सभापति एवं प्रधानमन्त्री शेरबहादुर देउवालाई पनि बधाई दिएका छन् ।