बर्दियाको प्रदेशसभा क्षेत्र १(२) प्रदेशसभा सदस्यमा नागरिक उन्मुक्ति पार्टीका राजकुमार चौधरी विजयी भएका छन् ।

उनी १३ हजार २३० मत ल्याएर विजयी भएका हुन् भने उनका निकटतम् प्रतिस्पर्धी नेकपा एमालेका भक्तबहादुर विश्वकर्माले १२ हजार १८३ मत प्राप्त गरेका छन् ।

चौधरी १ हजार ४७ मतको अन्तरले विजयी हुन सफल भएका मुख्य निर्वाचन अधिकृतको कार्यालय बर्दियाले जनाएको छ । गठबन्धनबाट प्रदेशसभा सदस्यमा उम्मेदवारी दिएकी अञ्जु दहितले ११ हजार ४९० मत पाएकी छन् । दहित बारबर्दिया नगरपालिकाकी पूर्व उपप्रमुख हुन् ।

बर्दियामा २ प्रतिनिधिसभा र ४ प्रदेशसभाकै मतपरिणाम सार्वजनिक भइसकेको छ । प्रतिनिधिसभा १ मा कांग्रेसका सञ्जयकुमार गौतम, क्षेत्र नम्बर २ मा स्वतन्त्र उम्मेदवार नागरिक उन्मुक्ति पार्टीका सल्लाहकार लालवीर चौधरी, क्षेत्र नम्बर १(१) मा सदस्य कांग्रेसका भुवनेश्वर चौधरी, १(२) मा नागरिक उन्मुक्ति पार्टीका चौधरी र क्षेत्र नम्बर २(१) मा जन्मजय तिमिल्सेना र क्षेत्र नम्बर २(२) मा नागरिक उन्मुक्ति पार्टीका धर्मबहादुर चौधरी विजयी भएका छन् ।