प्रतिनिधिसभा तथा प्रदेशसभा निर्वाचनको मतगणना जारी रहँदा अहिले अनपेक्षित मतपरिणामहरू आइरहेका छन् ।

केही महिनाअगाडि गठित राष्ट्रिय स्वतन्त्र पार्टीले अनपेक्षित मत पाउँदा ठूला दलहरूको अनुमान र हिसाबकिताब फेल खान पुगेको छ । 

रास्वपाका सभापति रवि लामिछाने आफैंले भारी मतान्तरसहित जीत दर्ता गरेका छन् । 

उनले आफ्ना निकटतम् प्रतिद्वन्द्वी नेपाली कांग्रेसका उमेश श्रेष्ठलाई ३४ हजार १६५ मत मतको अन्तरले पराजित गरेका हुन् । यसक्रममा लामिछाने ४९ हजार २६१ मत ल्याए ।

कुनै क्षेत्रमा यति ठूलो मतान्तरसहित हारजीत हुँदा केही क्षेत्रमा झिनो मतान्तरले चुनावी नतिजा आएको छ ।

प्रतिनिधिसभा सदस्यका ९ उम्मेदवारले ५ सयभन्दा कम मतान्तरले निर्वाचन जितेका छन्, जसमध्ये नेकपा एमालेका ४ जना सांसद छन् ।

यो निर्वाचनमा अहिलेसम्म सबैभन्दा थोरै मतान्तरले विजयी हुने नेता हुन्, नेकपा एमालेका वसन्तकुमार नेम्वाङ । उनी ४७ मतको अन्तरले विजयी भएका हुन् ।

उनले पाँचथर निर्वाचन क्षेत्र नम्बर १ बाट ३२ हजार ११० मत ल्याउँदा उनका निकटतम् प्रतिद्वन्दी नेपाली कांग्रेसका भीष्मराज आङदेम्बेले ३२ हजार ६३ मत ल्याएका छन् । 

सर्लाही निर्वाचन क्षेत्र नम्बर ३ बाट नेकपा एमालेका हरिप्रसाद उप्रेतीले ४७० मतान्तरले जितेका छन् । उनले ३२ हजार ९३८ मत ल्याउँदा उनका निकटतम् प्रतिस्पर्धी माओवादी केन्द्रका नरेन्द्र साह कलवारले ३२ हजार ४६८ मत ल्याएका छन् । 

यसैगरी, पर्सा क्षेत्र नम्बर ३ मा एमालेका राजकुमार गुप्ताले १ सय ५१ मतले जितेका छन् । उनले २४ हजार २६० मत ल्याउँदा उनको निकटतम् प्रस्पिर्धी कांग्रेसका सुरेन्द्रप्रसाद चौधरीले ४२ हजार ९०१ ल्याएका छन् ।

ताप्लेजुङ निर्वाचन क्षेत्र नम्बर १ मा एमालेका योगेशकुमार भट्टराई १ सय ९० मतान्तरले जितेका छन् ।

उनले २१ हजार ९४३ मत ल्याउँदा निकटतम् प्रतिस्पर्धी माओवादी केन्द्रका खेलप्रसाद बुढाक्षेत्रीले २१ हजार ७५३ मत ल्याएका छन् ।

धनुषा निर्वाचन क्षेत्र नम्बर २ मा नेपाली कांग्रेसका रामकृष्ण यादवले नेकपा एमालेका उमाशंकर अरगरियालाई १५७ मतले हराएका छन् । यादवले २१ हजार ११२ मत ल्याउँदा अरगरियाले १९ हजार ९५५ मत ल्याएका हुन् । 

यसैगरी, मनाङमा नेपाली कांग्रेसका टेकबहादुर गुरुङले नेकपा एमालेका पोल्देन छोपाङ गुरुङलाई ३२९ मतले हराएका छन् ।

कांग्रेसका गुरुङले २ हजार ५७५ मत ल्याएका छन् भने एमालेका गुरुङले २ हजार २४७ मत ल्याएका छन् । 

दैलेख क्षेत्र नम्बर २ बाट १ सय ५२ मतले नेपाली कांग्रेसका दिक्पालकुमार शाहीले एमालेका लक्ष्मीप्रसाद पोखरेललाई हराएका छन् । शाहीले २० हजार १५७ मत ल्याउँदा पोखरेलले २० हजार ५ मत ल्याएका छन् ।

काठमाडौं क्षेत्र नम्बर १ मा राष्ट्रिय प्रजातन्त्र पार्टीका रवीन्द्र मिश्रले नेपाली कांग्रेसका प्रकाशमान सिंहसँग १ सय २५ मतले हारेका छन् । मिश्रले ७ हजार १८ मत ल्याउँदा कांग्रेसका सिंहले ७ हजार १४३ मत ल्याएका छन् । 

दाङ २ बाट माओवादी केन्द्रकी रेखा शर्माले नेकपा एमालेका शंकर पोख्रेललाई १९३ मतले हराएकी छन् । रेखाले २६ हजार ८८० मत ल्याउँदा पोखरेलले २६ हजार ६८७ मत ल्याएका छन् ।