‘नेपाल अन्तरराष्ट्रिय नाट्य महोत्सव, २०७९ (निटफेस्ट २०२२)’ को दोस्रो संस्करण शुरू भएको छ । ‘सामाजिक रुपान्तरणको लागि रंगमञ्चः विविधिताको उत्सव’ भन्ने नाराका साथ शुरू भएको महोत्सव ९ दिनसम्म थापागाउँ काठमाडौंस्थित मण्डला थिएटरमा चल्नेछ । 

सो महोत्सवको उद्घाटन गर्दै संस्कृति, पर्यटन तथा नागरिक उड्डयनमन्त्री जीवनराम श्रेष्ठले महोत्सवले पर्यटन प्रवद्र्धनमा महत्वपूर्ण भूमिका निर्वाह गर्ने विश्वास व्यक्त गरे । उनले भने, ‘रंगमञ्चले मनोरञ्जनसँगै समाजलाई दिने सन्देशले रुपान्तरणमा महत्वपूर्ण भूमिका खेल्छ, पर्यटन प्रवर्द्धनमा पनि यस्ता महोत्सवले योगदान पुर्‍याउँछ ।’ 

महोत्सवमा सहभागिता जनाउन भारतबाट नेपाल आएकी अभिनेत्री शबाना आजमीले रंगकलाकर्मीको सहभागितामा बनेको मण्डला थियटरको प्रसंशा गरे । ‘समाजमा बदलाव ल्याउन सक्ने सामथ्र्य रंगमञ्चमा छ । नेपालको रंगकर्मीले एकताबद्ध भएर गरिरहनुभएको मेहनत सुन्दर छ । यसले नाटकलाई जीवित राख्छ’, अभिनेत्री आजमीले भने ।

महोत्सवका निर्देशक सिर्जना सुब्बाले कोभिडको कारण तीन वर्षपछि दोस्रो संस्करण आयोजना भएको जानकारी दिइन् । ‘हामीले दिएको नारा झैँ नाटकसमेतमा विविधता छ । नौ दिनसम्म चल्ने महोत्सवले हाम्रो बुझाइको दयारा फराकिलो बनाउनेमा विश्वत छु’, निर्देशक सुब्बाले भने । 

उद्घाटन समारोहमा काठमाडौं महानगरपालिकाका प्रमुख बालेन्द्र शाह, नेपाल संगीत तथा नाट्य प्रज्ञा प्रतिष्ठानका उपकुलपति हरिहर शर्मा, कलाकार सरोज खनाल, नाट्यकर्मी अनुप बराल, दयाहाङ राईलगायतको उपस्थिति रहेको थियो । 

कार्यक्रममा ‘इन्द्रधनुष’ नामक नाटक संग्रहसहित पुस्तकसमेत विमोचन गरिएको थियो । १२ देशका १८ नाटकको ३० मञ्चनसहित कार्यशाला, मास्टर क्लास, अन्तरक्रिया–विमर्शका कार्यक्रम हुने महोत्सवमा विश्वभरिबाट दुई सयभन्दा बढी नाट्य कलाकार सहभागी छन् । महोत्सवमा नेपालसहित भारत, भुटान, श्रीलंका, रुस, इटाली, स्पेन, बेलायत, बेलारुस, इजिप्ट, संयुक्त राज्य अमेरिका, उरुग्वे र अर्जेन्टिनाका नाटक समावेश छन् ।