डडेल्धुरामा प्रधानमन्त्री तथा कांग्रेस सभापति शेरबहादुर देउवासँग चुनाव हारेका सागर ढकालले आफ्नो राजनीतिक अभियानलाई निरन्तरता दिएका छन् । आगामी स्थानीय निर्वाचनमा युवाहरूलाई तयार गर्ने उद्देश्यका साथ आफूले राजनीतिक अभियान चलाउन थालेको सागरको भनाइ छ । 

स्थानीय स्तरमा नेता उत्पादनकै लागि डडेल्धुराबाट दार्चुला पुगेका उनी सुदूरपश्चिमका विभिन्न जिल्लामा पुग्ने कार्यक्रम छ ।  परिवर्तनको बीउ युवाहरूमा छर्दै सुदूरपश्चिमका सबै जिल्लामा पुग्ने योजना रहेको सागरले सामाजिक सञ्जालमार्फत बताएका छन् । 

‘हिजोअस्ति दार्चुला र आज राति बैतडीको गोठलापानी र भोलि बझाङ (२–३ बजेतिर, चैनपुर)। परिवर्तनको बीउ युवाहरूमा छर्दै सुदूरपश्चिमका सबै जिल्लामा जाँदैछौँ’, उनले ट्वीटरमा भनेका छन्, ‘युवाहरूलाई अब आउने स्थानीय तहको लागि तयार हुन आग्रह गरेका छौँ।’