नेपाल राष्ट्र बैैंकले तोकिएको नियम तथा निर्देशन नमानेको भन्दै चालु आर्थिक वर्षको पहिलो त्रैमासमा ९ वटा वाणिज्य बैंकलाई कारबाही गरेको छ । केन्द्रीय बैंकले विभिन्न समयमा जारी गरेको नियम, सर्कुलर तथा निर्देशन पालना नगरेकाले ती बैैंकहरू कारबाहीमा परेका हुन् ।

कारबाहीमा पर्ने बैंकहरूमध्ये प्रभु र कुमारी बैंकले राष्ट्र बैंकले रोक्का राख्न निर्देशन गरेको खाताको रकम पनि आफूखुशी फुकुवा गरेर कारोबार गरेका छन् । यी बैैंकले फुकुवा गरेको खाता र त्यसको रकम भने केन्द्रीय बैंकले सार्वजनिक गरेको छैन । 

नेपाल राष्ट्र बैंकले रोक्का राख्न निर्देशन दिएको खातामा कारोबार गरेको भन्दै प्रभु र कुमारी बैंकका प्रमुख कार्यकारी अधिकृतलाई सचेतसमेत गराइएको छ । सीईओकै निर्देशनमा उक्त कारोबार भएको भन्दै राष्ट्र बैंकले निर्देशन दिएको उल्लेख गरेको छ । यस्तो रकम फुकुवा गर्नेमा बैंक अफ काठमाडौं र प्राइम बैंकसमेत रहेको राष्ट्र बैंकले जनाएकाे छ । 

राष्ट्र बैंकको चालू आवको पहिलो त्रैमासमा थप बैंकहरूलाई पनि कारबाही तथा सचेत गराएको छ ।  कृषि विकास बैंक, हिमालयन बैंक, सनराइज बैंक, ग्लोबल आईएमई बैंक र मेगा बैंकलाई पनि कारबाही गरिएको छ ।

राष्ट्र बैंकले निर्धारण गरेको नियमअनुसार विपन्न वर्ग क्षेत्र कर्जा लगानी नगरेको भन्दै बैंक अफ काठमाडौं लिमिटेडलाई २ करोड ११ लाख ८५ हजार रुपैयाँ जरिबाना गरिएको छ ।

सम्पत्ति शुद्धीकरण सम्बन्धी ऐन र निर्देशन उल्लघंन गरेको भन्दै कृषि विकास बैंकलाई २० लाख रुपैयाँ जरिबाना गरिएको राष्ट्र बैंकले जानकारी दिएको छ ।

एक पटक लगानी भएको कर्जामा प्रिमियम दर वृद्धि गरेको भन्दै हिमालयन बैंक, सनराइज बैंक, ग्लोबल बैंक र मेगा बैंकको प्रमुख कार्यकारी अधिकृतलाई सचेत गराइएको छ ।

आधार दरभन्दा कम ब्याजदरमा कर्जा दिएको भन्दै सनराइज र मेगा बैंकका सीईओलाई सचेत गराइएको छ ।

सनराइज बैंकका प्रमुख कार्यकारी अधिकृत अवकाश हुँदा थप सुविधा दिएको भन्दै सनराइज बैंकको सञ्चालक समितिलाई सचेत गराइएको छ ।

मेगा बैंकले विगतमा लगानी भएका कर्जा असुल नगरी पटक–पटक नवीकरण गरेको भन्दै बैंकका सीईओ र प्रमुख कर्जा अधिकृतलाई सचेत गराइएको छ ।

कुन बैंकलाई कस्तो कारबाही ? हेर्नुस् सूचीसहित