नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले सुकुम्बासी बस्तीमा डोजर चलाइएकोमा आपत्ति जनाएका छन् । सुखसयलमा बसेको मान्छेले गरिब सुकुम्वासीका पीडा बुझ्न नसकेको उनले टिप्पणी गरे । 

पार्टी केन्द्रीय कार्यालय च्यासलमा मंगलवार आयोजित एक कार्यक्रममा ओलीले सुकुम्वासीमाथि दमन गरेर समस्याको समाधान नहुने बताएका हुन् । ‘सुकुम्वासी बस्तीमा तमासा देखियो, तमासा गर्ने हाकिमको कुरा सुन्दा शत्रुदेशसँगको लडाइँ गरेजस्तो– सुरक्षाकर्मीले साथ दिएनन् रे ! उनीहरू कुनै शत्रु होइनन्, गरिब गुरुबा हुन्’, ओलीले भने, ‘खोलाको किनारामा बसेका जनतालाई उठाएर के बहादुरी ? कसलाई पराजित गरेर को विजयी हुने ?’

मेयर बालेन शाहको निर्देशनपछि नगर प्रहरीले काठमाडौंको थापाथलीस्थित सुकुम्वासी बस्ती उठाउन सोमवार प्रयास गरेको थियो । सो प्रयासविरुद्ध सुकुम्वासीले प्रतिरोध गरेका थिए । ‘सुकुम्वासी र राज्यको बीचमा हार–जित जस्तो, सरकारका अंगले साथ नदिएका कारण पराजित हुनुप¥यो । के भनेको ?’, ओलीले भने, ‘सुखसयलमा बसेको मान्छेलाई गरिबको पीडा बुझ्न कठिन हुन्छ, उन्मादले समस्या फेरि बल्झिने छ ।’ 

निर्धा सुकुम्वासीलाई उठाउन डोजरको प्रयोग गरिएकोमा पनि उनले आपत्ति जनाए । ‘सुकुम्वासी हाम्रा दाजु-भाइ दिदी-बहिनी हुन्’, ओलीले भने ।