शनिवारदेखि स्थगित सुनसरी–४ को मतगणना मंगलवारदेखि शुरू भएको छ ।

सुनसरी सदरमुकाम इनरुवा–१ स्थित भगवती माविमा चलेको सर्वदलीय बैठक सकिएलगतै मतगणना शुरू भएको हो ।

मतगणनाका क्रममा निर्वाचनमा खटिएका कर्मचारीले नेकपा एमालेका उम्मेदवारको पक्षमा ६०६ मत थपेपछि विवाद सिर्जना भएको थियो । 

विवादसँगै मतगणना स्थगित भएपछि लोकतान्त्रिक वाम गठबन्धनका उम्मेदवार तथा नेपाली कांग्रेसका केन्द्रीय सदस्य ज्ञानेन्द्रबहादुर कार्कीले पुनः मतगणना गर्न माग गरेका थिए ।

सञ्चार तथा सूचना प्रविधिमन्त्री समेत रहेका उनले पुनः मतगणनाको माग गरे पनि सोमवार साँझ निर्वाचन आयोगले पुनः मतगणना नगरी यथास्थितिमा मतगणना शुरू गर्न निर्देशन दिएको थियो ।

मंगलवार बसेको सर्वदलीय बैठकले धाँधलीरहित, शान्तिपूर्ण, निष्पक्ष र सीसीटीभीको निगरानीमा मतगणना गर्ने निर्णय गरेपछि मतगणना शुरू भएको मुख्य निर्वाचन अधिकृत अर्जुन अधिकारीले जानकारी दिए ।

पछिल्लोपटक सार्वजनिक गरिएको मतपरिणामअनुसार कांग्रेसका उम्मेदवार कार्कीले १६२ मतले अग्रता लिएका छन् ।

उनले २३ हजार ७६६ मत प्राप्त गरेका छन् भने एमालेका तर्फबाट जगदीशप्रसाद कुसियैतले २३ हजार ६०४ मत प्राप्त गरेका छन् ।