अमेरिकाको रक्षा मन्त्रालय पेन्टागनले चीनको आणविक हतियार कार्यक्रमका विषयमा चिन्ता व्यक्त गरेको छ । 

चीनले द्रुत गतिमा आणविक हतियार क्षमता बढाइरहेको र सन् २०३५ सम्ममा उसको वारहेड संख्या लगभग चार गुणाले बढ्ने पेन्टागनको चेतावनी छ । अमेरिकासँगको हतियार क्षमता नजिक चीन पुग्न लागेको भन्दै उसले चिन्ता व्यक्त गरेको हो । 

‘आगामी दशकमा जनगणतन्त्र चीनले आफ्नो आणविक बललाई आधुनिकीकरण गर्ने, विविधतापूर्ण बनाउने र विस्तार गर्ने लक्ष्य बनाएको छ,’ पेन्टागनले मंगलवार प्रकाशन गरेको प्रतिवेदनमा उल्लेख छ । एक दशकअघि चीनले शुरू गरेको आणविक आधुनिकीकरण पहलभन्दा अहिलेको तयारी निकै विशाल र जटिल रहेको पेन्टागनको दाबी छ । 

चस्नसँग अहिले ४०० आणविक वारहेड रहेको पेन्टागनले जानकारी दिएको छ । पहिला अनुमान गरिएको ३५० भन्दा यो बढी संख्या हो । 

अहिलेकै गतिमा विकास गरिरहेमा सन् २०३० सम्ममा चीनले एक हजार वारहेड तयार पार्ने र सन् २०३५ मा १५ सयवटा वारहेड उससँग हुने पनि पेन्टागनको प्रक्षेपण छ । 

अमेरिकासँग चाहिँ अहिले ३७ सय ५० वटा सक्रिय वारहेड छ भने उसको भण्डारमा ५ हजारभन्दा बढी आणविक हतियार छन् ।