युरोपेली आयोगकी अध्यक्ष उर्सुला फोन देर लेयनले रुस–युक्रेन द्वन्द्वमा एक लाखभन्दा बढी सैनिक मारिएको दाबी गरेकी छन् । 

उनले आफ्नो ट्विटर अकाउन्टमा एउटा भिडियो राखी उक्त दाबी गरेकी हुन् । युक्रेनले लेयनको दाबीमा आपत्ति जनाएपछि उक्त ट्वीट डिलिट गरिएको छ ।

राष्ट्रपति भोलोदीमीर जेलेन्स्की र युक्रेनका शीर्ष अधिकारीलाई मात्र यस विषयमा बोल्ने छुट रहेको युक्रेनको तर्क छ । 

तर युक्रेनी अधिकारीहरूले लेयनको दाबीको प्रतिकार चाहिँ गरेनन् । 

लेयनको भिडियोमा एक लाखभन्दा बढी युक्रेनी सैनिक मारिएको र २० हजारभन्दा बढी सर्वसाधारण हताहत भएको उल्लेख थियो । त्यो भिडियो हटाएर नयाँ भिडियो अप्लोड गरिएको छ । नयाँ भिडियोमा मारिएका सैनिकको संख्या उल्लेख गरिएको छैन । 

लेयनले उक्त आँकडाको स्रोत खुलाएकी छैनन् । 

यसअघि अमेरिकी सेनाका शीर्ष अधिकृत जनरल मार्क मिल्लीले यस द्वन्द्वमा एक लाखभन्दा बढी सैनिक मारिएको वा घाइते भएको अनि चेपुवामा परी ४० हजार सर्वसाधारणको पनि मृत्यु भएको उल्लेख गरेका थिए ।