पोल्यान्डले पश्चिमी युक्रेनका केही भागलाई आफूमा मिसाउन खोजेको रुसका विदेशी गुप्तचर सेवाका प्रमुख सर्गे नारीश्किनले दाबी गरेका छन् । 

पोल्यान्डका राष्ट्रपति आन्द्रेज डुडाले सम्बन्धि निकायहरूलाई यसका लागि काम गर्न निर्देशन दिइसकेको उनको भनाइ छ । 

बुधवार आरआईए नोभोस्तीसँगको अन्तर्वार्तामा नारीश्किनले रुससँग गोप्य सूचना रहेको बताए । उक्त सूचनाअनुसार, पोल्यान्डले सन् १९४३ मा भएको भोलहिनिया सामूहिक हत्याका लागि युक्रेनसँग ठूलै क्षतिपूर्ति मागेको छ ।

उक्त घटनामा युक्रेनी राष्ट्रवादी तथा युक्रेनी विद्रोही सेनाले लगभग एक लाख पोलिशहरूको हत्या गरेका थिए । 

उक्त घटनामा पीडित बनेका मानिसको सन्ततिले यस्तो माग राखेको भनी पोल्यान्ड सरकारले प्रस्तुत गर्न खोजेको सूचना आफूले पाएको नारीश्किनको भनाइ छ । 

पोल्यान्डको नेतृत्वले पनि सञ्चारमाध्यमहरूलाई देशको भूभाग बढाउनका लागि जनताको अभिमत सिर्जना गराउन निर्देशन दिएको उनी बताउँछन् । 

रुसले आफ्ना प्राचीन भूभागहरूलाई जनमतसंग्रहमार्फत फिर्ता लिएको घटनाबाट पोल्यान्डले पाठ सिकेको नारीश्किनको भनाइ छ । पोल्यान्डले पनि त्यसैगरी युक्रेनको पश्चिमी भागमा रहेका लभिभ, इभानो–फ्रान्क्वोस्क र तेर्नोपोल आफूमा मिसाउन खोजेको छ ।