टर्कीको एक कम्पनीले युक्रेनको विद्युत् आपूर्ति सुचारु गराउनका लागि पानीमा तैरिने ‘पावरशिप’ हरू पठाउने विषयमा कुराकानी गरिरहेको निक्केइ एसिया पत्रिकाले खबर दिएको छ । 

कारपावरशिप नामक उक्त कम्पनीले आफूसँग यस्ता जहाजको सबभन्दा ठूलो बेडा रहेको दाबी गरेको छ । उसले युक्रेनको सबभन्दा ठूलो बन्दरगाह ओडेसा नजिक जहाजहरू पठाउने भएको हो । 

‘हामीले ओडेसा क्षेत्रको प्रशासन तथा युक्रेनको विद्युत् कम्पनी युक्रेनर्जोसँग ओडेसानजिक तीनवटा पावरशिप राख्ने विषयमा कुराकानी गरिरहेका छौं,’ कम्पनीको व्यापारिक विभाग प्रमुख जेनप हारेजीले बताइन्, ‘त्यसले कुल ३०० मेगावाट बिजुली दिलाउनेछ ।’

सन् २०२२ भित्रै यी जहाजहरू तैनाथ गराउन सकिने उनको भनाइ छ । 

तीन जहाजले उत्पादन गर्ने ३०० मेगावाटबाट १० लाख घरलाई विद्युत् आपूर्ति गराउन सकिन्छ । 

रुसले युक्रेनका ऊर्जा संरचनाहरूमा क्षेप्यास्त्र प्रहार गरी नष्ट गरेपछि त्यहाँ जाडो याममा न्यानो बनाउने विद्युत् आपूर्ति गर्न नसकिने डर बढेको छ । युरोपेली संघले पनि युक्रेनमा थप विद्युत् दिलाउनका लागि कुराकानी गरिरहेको छ । 

युक्रेनर्जोका प्रमुख कार्यकारी अधिकृत भोलोदीमीर कुर्द्रीत्स्कीले रुसी आक्रमणका कारण देशका सबै ऊर्जा स्टेसनहरू नष्ट भएको बताएका छन् ।