उत्तर कोरियाका सर्वोच्च नेता किम जोङ उनकी एक छोरी सार्वजनिक भएर संसारभरि चर्चा चलेपछि अर्की छोरीको तस्वीर पनि आएको छ । 

जेठी छोरी किम जु एईको तस्वीर दुईपटक सार्वजनिक भएपछि कान्छी छोरीको तस्वीर पनि सरकारी टीभीमा आएको छ । तर तस्वीर आएलगत्तै त्यसलाई हटाउन भनिएको छ । 

कान्छी छोरीले अनेकौं बच्चाहरूसँग एउटा गीतमा अभिनय गरेकी हुन् । गत सेप्टेम्बर महिनामा उत्तर कोरियाको राष्ट्रिय दिवसमा छोरीले गीत गाएकी थिइन् । त्यसमा किम र उनकी पत्नी री सोल जू पनि उपस्थित थिए । 

समारोहको प्रत्यक्ष प्रसारणमा किम जस्तै देखिने बच्चीलाई हाइलाइट गरिएकाले उनी किमकी छोरी नै भएको विश्लेषकहरू बताउँछन् । 

समारोहको फूटेज नोभेम्बर १९ मा दोस्रोपटक प्रसारित गरिएको थियो । त्यसको केही घन्टाअघि किमकी जेठी छोरीलाई टीभीमा देखिएको थियो । 

तर दोस्रोपटक प्रसारण गरिँदा बच्चीको अनुहार गायब बनाइयो अनि अरू कसैको अनुहार राखियो । 

उत्तर कोरियाको निगरानी गर्ने एनके न्युजले बच्चीको तस्वीरका विषयमा किम सरकार संवेदनशील रहेको भनेको छ । 

कान्छी छोरीको तस्वीर प्रसारित गर्नु अनुचित रहेको किमले ठानेको हुन सक्ने एनके न्युजको अनुमान छ । कतिपयले चाहिँ ती बच्ची किमको नभई किमकी बहिनी यो जोङकी छोरी हुन सक्ने अनुमान गरेका छन् ।