प्रदेश १ को संसद्मा अघिल्लोपटक १० सांसदसहित चौथो र निर्णायक शक्ति बनेको नेकपा एकीकृत समाजवादी यसपटक प्रत्यक्षतर्फ ३ सीटमा समेटिएको छ ।

नेकपा एमालेबाट विद्रोह गर्दै १० सांसदले एकीकृत समाजवादी रोजेपछि भीम आचार्य नेतृत्वको तत्कालीन एमाले सरकार अल्पमतमा परेको थियो ।

त्यसपछि एकीकृत समाजवादीका राजेन्द्र राई मुख्यमन्त्री बने ।

तर अहिलेको चुनावी नतिजाले एकीकृत समाजवादी रक्षात्मक अवस्थामा पुगेको छ । सत्ता गठबन्धनमा भागबण्डा हुँदा उसले प्रदेशसभाका ११ क्षेत्रमा उम्मेदवारी दिएको थियो । तीमध्ये ३ स्थानमा मात्र जीत हात पार्‍यो ।

दुईजना पुरानै अनुहार दोहोरिए भने एकजना नयाँ अनुहार चुनिए । 

प्रदेश १ का मुख्यमन्त्री समेत रहेका नेकपा एसका सचिव राजेन्द्रकुमार राई र पर्यटनमन्त्री खिनु लङ्वा प्रदेशसभामा दोहोरिए ।

यस्तै पाँचथरका कमलप्रसाद जबेगु नयाँ अनुहारका रूपमा प्रदेशसभामा प्रवेश गरेका छन् । जबेगु १६ हजार ८४९ मत ल्याएर विजयी बनेका हुन् । उनका निकटतम् प्रतिस्पर्धी एमालेका राजकुमार भण्डारीले १६ हजार २१५ मत ल्याएका थिए । 

भोजपुरमा मुख्यमन्त्री राई १६ हजार १ सय १८ मत प्राप्त गरेर विजयी बन्दा प्रतिस्पर्धी एमालेका हरिबहादुर राईले १२ हजार २२६ मत प्राप्त गरे । 

पर्यटन मन्त्री लङ्वा इलाम २(१) बाट निर्वाचित भइन् । इलामकै अर्को क्षेत्रमा प्रतिनिधिसभातर्फ पार्टीका सम्मानित नेता झलनाथ खनाल पराजित हुँदा लङ्वाले जीत निकालिन् ।

लङ्वा १३ हजार ३ सय ७१ मत ल्याएर विजयी बन्दा एमालेकी शोभा पराजुलीले ११ हजार ३९५ मत पाइन् ।

सङ्खुवासभा १(२) मा एमालेका विदुर लिङ्थेपले एकीकृत समाजवादीकी नेतृ सरिता खड्कालाई पराजित गरे । लिङथेपले १५ हजार ४ सय ८२ मत पाउँदा खड्काले १५ हजार २ सय ४३ मत मात्रै प्राप्त गरेकी थिइन् । 

मोरङका दुईवटा क्षेत्रमा टिकट पाएको एकीकृत समाजवादीले दुवै क्षेत्र गुमायो ।

पूर्व जिविस सभापति समेत रहेका एमालेका खड्गबहादुर बस्नेतले प्रदेश १ सरकारका बहालवाला यातायात तथा सञ्चार मन्त्री उपेन्द्र घिमिरेलाई पराजिते गरे । 

बस्नेत १३ हजार ५ सय ३९ मत ल्याएर विजयी हुँदा एकीकृत समाजवादीका घिमिरेले १३ हजार ८ सय ६३ मत मात्रै प्राप्त गरेका थिए । 

मोरङ ३(२)मा एमालेका ज्ञानेन्द्र सुवेदी विजय बने । सुवेदीले नेकपा एसका लक्ष्मी कुमार श्रेष्ठलाई पराजित गरे । निवर्तमान मेयर समेत रहेका सुवेदीले १७ हजार ४ सय २८ मत प्राप्त गरेका थिए भने श्रेष्ठले १५ हजार ३८५ मत प्राप्त गरेका थिए । 

खोटाङमा एमालेकै पाँचकरण राईले एसका वीरबल काजी राईलाई पराजित गरे । 

पाँचकरणले १३ हजार १५७ मत प्राप्त गर्दै संसद छिर्ने बाटो तय गर्दा वीरबलले भने ११ हजार ९ सय ६५ मत मात्रै प्राप्त गरेका थिए । धनकुटा १ (१)मा एमालेका निरन राईले फराकिलो मतान्तरले प्रतिस्पर्धीलाई हराए ।

सुनसरी १ (२)मा  नेकपा एसका उम्मेदवार चौथो स्थानमा समेटिए । यस क्षेत्रमा पनि एमालेका विजयकुमार राई विजयी बने । विजयले १२ हजार ४ सय ६५ मत प्राप्त गर्दै विजयी बन्दा राप्रपा अनिल ढकालले ७ हजार ४ सय ८२ मत प्राप्त गरेका थिए । तेस्रो स्थानमा स्वतन्त्र रोहित सुब्बाले ६ हजार ८ सय ३९ मत प्राप्त गरेका थिए । एसका रेवती रवण राईले ४ हजार ९८८ मत प्राप्त गरेका छन् । 

झापा २(१)मा एमालेका एकराज कार्कीले १८ हजार ७ सय ५८ मत प्राप्त गर्दै संसद् छिर्ने यात्रा तय गर्दा एकीकृत समाजवादीका पुष्पराज पोख्रेलले ६ हजार ११० मत प्राप्त गरेका छन् । ताप्लेजुङ १ (१)मा तिलकुमार मेन्याङ्वोले १२ हजार ७७२ मत प्राप्त गरेर जीत दर्ज गर्दा एसका खेमबहादुर वानेमले ८ हजार ७३३ मत प्राप्त गरेका छन् ।   

प्रतिनिधिसभातर्फ भने नेकपा एस प्रदेश १ मा शून्य बनेको छ । उदयपुर क्षेत्र नम्बर २ बाट सत्ता गठबन्धनबाट उम्मेदवार बनेको जगन्नाथ खतिवडा पराजित बने । खतिवडाले १२ हजार ८ सय ९३ मत मात्रै प्राप्त गरेका छन् भने एमालेका अम्बरबहादुर रायमाझीले १५ हजार ५ सय २१ मत प्राप्त गरेका थिए ।

सत्ता गठबन्धनबाटै बागी उम्मेदवारी दिएका रामकुमार राई यस क्षेत्रमा तेस्रो भए  । राईले १० हजार ३७९ मत प्राप्त गरेका थिए । 

यस्तै नेकपा एसका सम्मानित नेता झलनाथ खनाल पनि इलाम १ मा पराजित भए । खनालले २३ हजार ०८९ मत प्राप्त गरेका थिए । उनलाई आफ्नै पूर्व कार्यकर्ता महेश बस्नेतले पराजित गरे ।