नेपाल उद्योग परिसंघ प्रदेश १ ले विराटनगरमा माघ १९ गतेदेखि २८ गतेसम्म सिएनआई एक्स्पो २०२३ आयोजना गर्ने भएको छ । नेपाल उद्योग परिसंघ प्रदेश १ ले बिहीवार काठमाडौंमा पत्रकार सम्मेलन गर्दै माघ १९ गतेदेखि २८ गतेसम्म हाइड्रो, पर्यटन, स्वास्थ्य, शिक्षा र कृषिसँग सम्बन्धित व्यापार मेला सीएनआई एक्स्पो २०२३ आयोजना गर्न लागेको जानकारी दिएको हो । 

पत्रकार सम्मेलनमा बोल्दै प्रदेश १ परिसंघका सदस्य गिरिजा सार्दले अन्य एक्स्पोभन्दा सीएनआई एक्स्पो २०२३ फरक ढङ्गले गर्न खोजेको बताए । उनले एक्स्पो कुनै एउटा क्षेत्र मात्रै नभएर धेरै क्षेत्रलाई समेटेर प्रदेश नम्बर समग्रमा ठूलो एक्स्पो आयोजना गर्न लागेको बताए । 

उनले एक्स्पोमार्फत उद्योग परिसंघमा एउटा क्षेत्रको मात्रै संग्लनता नरहेको भन्दै समग्र सबै क्षेत्रको सहभागिता रहेको देखाउन खोजिएको बताए । उनले एक्स्पोमा भारतीयहरूलाई समेत बोलाउने प्रयास भइरहेको जानकारी दिए । उनले मेलामा करिब ४ हजार मानिसहरुलाई सहभागिता गराउने उद्धेश्य रहेको बताए । उनले मेलामा ५० करोडभन्दा बढीको व्यापार हुने अपेक्षा रहेको बताए । 

सार्दले एक्स्पो १० दिनसम्म हुने जानकारी दिए । उनले मेलामा ३५० वटा स्टलहरू राखिने बताए । स्टलहरूमा स्वदेशी उत्पादनलाई प्राथमिकता दिने आयोजकले जनाएको छ ।