इरानका सुरक्षाकर्मीहरूले फूटबल विश्वकपमा इरानको हारमा खुशियाली मनाउने एक व्यक्तिलाई गोली हानेर मारेको एक मानवअधिकार संस्थाले दाबी गरेको छ । 

मारिएका युवकको नाम मेहरान भएको बताइएको छ । 

अमेरिकाले इरानलाई हराएपछि २७ वर्षीउ मेहरानले गाडीको हर्न बजाएर खुशियाली मनाएको अनि सुरक्षाकर्मीहरूले उनको निधारमा गोली हानेर मारेको ओस्लोमा रहेको इरानी मानवअधिकार संस्थाको दाबी छ । 

अमेरिकासँग हारेपछि इरान प्रतियोगिताबाट बाहिरिएको थियो । त्यसपछि उत्तरी इरानमा सरकारविरोधी प्रदर्शनकारीहरूले खुशियाली मनाएका थिए । केही शहरमा मानिसले सडकमा निस्केर नाचगान गरी रमाइलो गरेका थिए । 

उनीहरू फूटबल टीम इस्लामिक गणतन्त्रको प्रतिनिधित्व गर्ने भएकाले हारमा खुशी भएका हुन् । 

इरानमा महिलाप्रति कठोर व्यवहार गरिने गरेको भन्दै त्यसको विरोधमा दुई महिनादेखि प्रदर्शन भइरहेको छ । विरोधकर्ताहरूलाई समर्थन गर्ने गरी इरानी फूटबल टीमका सदस्यहरूले विश्वकपको पहिलो खेलमा राष्ट्रिय गान गाएका थिएनन् । तर सरकारले चेतावनी दिएपछि उनीहरूले दोस्रो र तेस्रो खेलमा राष्ट्रिय गान गाएका थिए ।