भारतसँग चीनको सीमाविवाद चलिरहेको सन्दर्भमा चीनले सीमानजिक नयाँ सैन्य पोस्ट बनाएको पोलिटिको पत्रिकाले खबर दिएको छ । 

चीनले दीर्घकालीन रूपमा सीमामा बस्नका लागि तयारीस्वरूप पोस्ट बनाएको नयाँ भूउपग्रहीय तस्वीरले देखाएको छ । 

सेन्टर फर स्ट्राटेजिक यान्ड इन्टरनेसनल स्टडीजको चाइना पावर प्रोजेक्टले भूउपग्रहीय तस्वीर पाएको हो । 

त्यसमा चिनियाँ जनमुक्ति सेनाले पांगोङ तालमा सैनिकहरू राख्नका लागि हेडक्वार्टर र ग्यारिसन बनाएको देखिन्छ । यो ताल भारत र चीनको सीमामा पर्छ । 

चीनलाई उक्त क्षेत्रमा आफ्ना सैनिकहरू द्रुत गतिमा परिचालन गर्नका लागि यस फर्वार्ड कमान्ड पोस्टले सहायता गर्नेछ । 

चीनले सन् २०२० मेमा त्यहाँ रहेको अस्थायी शिविर भत्काएर स्थायी संरचना बनाउन थालेको सीएसआईएसका विज्ञहरू बताउँछन् । म्याक्सार टेक्नोलोजीजले अक्टोबर ४ मा प्राप्त गरेको तस्वीरमा निर्माण कार्य सम्पन्न भइसकेको देखिन्छ । 

नयाँ बनेका भवन वरिपरि सुरुङ र हतियार भण्डारहरू रहेका छन् । आउटपोस्टमा सशस्त्र वाहनहरू पनि छन् । 

भारतसँग भविष्यमा हुन सक्ने द्वन्द्वमा यो आउटपोस्ट उपयोगी हुन सक्ने चीनको आकलन रहेको बुझिन्छ । त्यहाँ भएका सशस्त्र गाडीहरूले ताल वरपरका महत्त्वपूर्ण क्षेत्रमा सैनिकहरूलाई द्रुत गतिमा पुर्‍याउन सहयोग गर्नेछन् । अनि हावित्जर र हवाई प्रतिरक्षा हतियार ल्याएर चिनियाँ सेनाको पोजिसन बलियो बनाउन पनि सजिलो हुने भएको छ । 

चिनियाँ सेनालाई तालमा सहज आवागमन गराउनका लागि सजिलो बनाउने पुल पनि बनाइएको छ ।