सरकार र नेत्रविक्रम चन्द नेतृत्वको नेपाल कम्युनिष्ट पार्टीबीच यसअघि दुई पक्षबीच भएको सहमति कार्यान्वयन गर्ने विषयमा वार्ता भएको छ । गृह मन्त्रालयमा बिहीवार दिउँसो भएको वार्तामा सरकारका तर्फबाट गृहमन्त्री बालकृष्ण खाण, निवर्तमान कानून न्याय तथा संसदीय व्यवस्थामन्त्री गोविन्दप्रसाद शर्मा, महान्यायाधीवक्ता खम्मबहादुर खाती, गृहसचिव विनोदप्रकाश सिंह सहभागी थिए । नेकपाका तर्फबाट प्रवक्ता खड्गबहादुर विश्वकर्मा प्रकाण्ड सहभागी थिए ।

वार्तामा नेकपासँग सम्बन्धित मुद्दा चाँडो टुंग्याउन विषयमा छलफल भएको थियो । मुद्दाका विषयमा अहिलेसम्म भएका प्रगतिबारे पनि कुराकानी भएको थियो । नेकपा कार्यकर्ताको मुद्दा टुंग्याउन गत भदौ २१ गते बसेको मन्त्रिपरिषद् बैठकले गृह प्रशासनमै रहेका मुद्दा प्रशासनिक प्रक्रिया र राजनीतिक तवरबाट टुंग्याउने र अदालती प्रक्रियामा पुगेका मुद्दालाई टुंग्याउन वर्तमान कानूनले अप्ठ्यारो पर्ने भएमा संशोधन गरेर भए पनि टुंग्याउने निर्णय गरेको थियो । 

उक्त निर्णय कति कार्यान्वयन भयो, आगामी दिनमा तत्काल कार्यान्वयन गर्न सक्ने अवस्था छ कि छैन ? भन्नेबारेमा नेकपा प्रवक्ता विश्वकर्माले जिज्ञासा राखेका थिए । जवाफमा सरकारका तर्फबाट निर्णय कार्यान्वयन गर्न सरकार प्रतिबद्ध रहेको धारणा आएको थिए । 

सरकारका तर्फबाट गृहमन्त्री खाणले नेकपाका नेताहरूसँग भएको सहमतिका आधारमा सरकारले गरेको निर्णय कार्यान्वयन गर्न सरकार प्रतिबद्ध रहेको बताए । ‘सरकारको निर्णय कार्यान्वयन गर्न प्रतिबद्ध छौँ’, गृहमन्त्री खाणले भने, ‘केही प्रशासनिक तवरबाट हुने निर्णय भइसकेका छन् । अदालती प्रक्रियामा गएका मुद्दाहरूबारे पनि प्रक्रिया अगाडि बढिसकेको छ । निर्णयअनुसार कार्यान्वयन हुन्छ ।’