एमाले नेता भीम रावल काठमाडौं महानगरपालिकाका मेयर बालेन शाहसँग सवाल जवाफमा उत्रिएका छन् । बालेन र अमेरिकी राजदूतबीच भएको भेटवार्ताबारे प्रश्न उठाएका रावलले उनको जवाफमा चित्त नबुझाएर फेरि आधा पेज लामो धारणा ट्वीटरमार्फत सार्वजनिक गरेका छन् । रावलले बालेनले आफ्नो प्रश्नमा सरल जवाफ नदिएको बताउँदै असान्दर्भिक कुरा गरी उत्तेजना प्रकट गरेको आरोप लगाएका छन् । 

रावलले भनेका छन्, ‘उहाँले ‘‘तपाईहरु जस्तो विदेशी सहयोग माग्ने कुनै रहर छैन’’ भन्ने असान्दर्भिक कुरा गरी उत्तेजना प्रकट गरेबाट नेपालको संविधान र नेपालको मर्यादा र स्वाभिमानको रक्षा गरौं भन्ने मेरो भनाइले घोचेको हो कि ? म फेरि पनि बालेनजीलाई प्रश्न गर्छु– के तपाईले परराष्ट्र मन्त्रालयसँग पत्राचार गरी स्वीकृति लिएर अमेरिकी राजदूतलाई भेट्नु भएको हो ? तपाईले भन्नु भए झैं उहाँले परराष्ट्र मन्त्रालयबाट स्वीकृति लिएर आएपछि भेटेको हो भने उहाँले परराष्ट्र मन्त्रालयबाट स्वीकृति लिएर आएको जानकारी तपाईलाई कसरी भयो ? आवेश, उत्तेजना र ओठेजवाफ जनउत्तरदायी प्रणालीसँग मेल खान्न ।’

नेपालको सविधान अन्तर्गत जननिर्वाचित निकायका कुनैपनि व्यक्तिले कुनैपनि नागरिकले उठाएका प्रश्नको तथ्यसंगत जवाफ दिनु पदीय दायित्व हुने रावलको भनाइ छ । यद्यपि साहले बिहीबार अमेरिकी राजदूतसँगको भेटवार्ता परराष्ट्र मन्त्रालयको स्वीकृतिमा भएको पत्र सार्वजनिक गरिसकेका छन् । यस्तै रावललाई सामाजिक सञ्जालमार्फत जवाफ दिँदै बालेनले आफूले अमेरिकामा नेपाली सभ्यता झल्काउने मन्दिर अथवा पाटी पौवा बनाइदिन सहयोग गर्ने भनेर राजदूतलाई पठाएको पनि बताएका थिए ।