प्रतिनिधिसभातर्फ स्याङ्जाको दुवै क्षेत्रमा नेपाली कांग्रेसले विजय हासिल गरेको छ । क्षेत्र नम्बर १ मा  कांग्रेसका राजु थापा र २ मा  पार्टी उपसभापतिसमेत रहेका धनराज गुरुङ विजयी भएका हुन् । 

क्षेत्र नम्बर १ मा थापाले एमालेका नारायण प्रसाद मरासिनीलाई पराजित गरे । थापाले ३१ हजार ९९९ मत पाउँदा एमालेका मरासिनीले २८ हजार ७४४ मत पाए । यस्तै राष्ट्रिय स्वतन्त्र पार्टीका बोधराज रेग्मी ६ हजार ६५ मतका साथ तेस्रो भए । 

सोही क्षेत्रको प्रदेशसभा क्षेत्र नम्बर १ तर्फ एमालेकी सीता कुमारी सुन्दास १४ हजार ६९० मतका साथ विजयी भइन् । निकटतम् प्रतिद्वन्द्वी माओवादी केन्द्रकी अमृता थापाले १३ हजार २६७ मत प्राप्त गरिन् । यसैगरी राप्रपाका सूर्यलाल श्रेष्ठ १ हजार ५११ मत पाएर तेस्रो बने । 

यसैगरी प्रदेशसभा क्षेत्र नम्बर २ मा पनि कांग्रेसका बुद्धि बहादुर रानालाई पराजित गर्दै एमालेका सुधीर कुमार पौडेल विजयी भए । पौडेलले १७ हजार ४४१ मत ल्याएर विजय हासिल गर्दा रानाले १४ हजार ४३५ मत पाए । राना जम्मा ६ मतले पराजित भएका हुन् । 

यसैगरी शनिबार राति सम्पन्न मतगणनाको अन्तिम नतिजाअनुसार प्रतिनिधिसभा क्षेत्र नम्बर २ मा धनराज गुरुङ ३१ हजार ४६६ मतका साथ विजयी हुँदा एमालेकी सचिव समेत रहेकी पद्मा कुमारी अर्यालले २५ हजार ८३९ मत पाएर पराजय भोगिन् । यस्तै राष्ट्रिय स्वतन्त्र पार्टीका टीक राज गुरुङले ८ हजार ११३ मत पाएर तेस्रो भए । 

सोही क्षेत्रको प्रदेशसभा निर्वाचन क्षेत्र नम्बर १ मा कांग्रेसका भोजराज अर्याल १५ हजार १६१ मतका साथ विजयी हुँदा एमालेका मोहन प्रसाद रेग्मी १२ हजार ४३१ मत ल्याएर पराजित बने । 
यस्तै प्रदेशसभा क्षेत्र नम्बर २ मा कांग्रेसका महेश भट्टराई १८ हजार ७८८ मत पाएर विजयी हुँदा एमालेका बुद्धिमान श्रेष्ठ १७ हजार २ मत पाएर पराजित बने । स्याङ्याको दुई प्रदेशसभामा एमालेले सत्ता गठबन्धन भत्काउन सफल भएको नतिजाले देखाएको छ । 

निर्वाचन सकिएको १० दिनपछि बुधबारदेखि स्याङ्जाको २ नम्बर निर्वाचन क्षेत्रको मतगणना सुरु भएको थियो । क्षेत्र नम्बर २ मा मंसिर ४ गतेको निर्वाचनमा धाँधली भएको भन्दै मतगणना सुरु गर्नेबारेमा विवाद हुँदै आएको थियो ।

तर, धाँधली नभएको निष्कर्ष निकाल्दै निर्वाचन आयोगले मतगणना शुरू गर्न निर्देशन दिएसँगै बुधबार रातिदेखि गणना थालिएको थियो । चापाकोट नगरपालिकाका ३, ४ र ५ नम्बरका ४ वटा बुथमा नेपाली कांग्रेसले बुथ कब्जा गरी एकलौटी मतदान गरेको दाबी एमालेको छ ।