बागलुङको गलकोट नगरपालिका–५ हरिचौरबाट बडिगाड, निसीखोला गाउँपालिका हुँदै प्यूठान जोड्ने निर्वाचन क्षेत्र रणनीतिक सडक आयोजनाको काम शुरूआत भएको छ ।

शनिवार गलकोट–७ मल्ममा सडक स्तरोन्नतिको वडाध्यक्ष राजबहादुर थापाले शुभारम्भ गरे । उनले गलकोट मात्रै नभएर सिङ्गै पश्चिम बागलुङको विकासमा सडक मेरुदण्डका रूपमा रहने बताए । 

सडक विभागले ३० करोड ४३ लाख रुपैयाँको ठेक्कामार्फत आयोजनाको काम अगाडि बढाएको हो । निर्माण कम्पनी लोपूर्ण कन्स्ट्रक्सन प्रालिका प्रबन्धक अमिन लामाले बजेटबाट ८ किलोमिटर सडक कालोपत्र गरिने बताए ।

शुरूको चरणमा मल्म र हरिचौरबाट गरी २ खण्डमा कालोपत्रका लागि पूर्वाधार तयारीको काम गरिने उनको भनाइ छ ।

‘कुनै अवरोध नभएमा ३० महिनाभित्रैमा काम सक्ने हाम्रो लक्ष्य छ,’ प्रबन्धक लामाले भने, ‘११ किलोमिटरमा सडक कटिङ हुन्छ, ८ किलोमिटर जति कालोपत्र हुन्छ ।’