वर्ष २०७९ को मंसिर दोस्रो सातासम्म आउँदा ७ वटा नेपाली फिल्म हिट साबित रहे । जसमा केही फिल्म चामत्कारिक व्यापार गर्दै राम्रै नाफामा गए भने केहीले नेपालबाटै लगानीचाहिँ सुरक्षित गरे ।

वैशाखमा प्रदर्शनमा आएको ‘ए मेरो हजुर ४’ले नेपालबाटै लगानी सुरक्षित गर्‍यो । जेठमा प्रदर्शनमा आएको ‘कबड्डी ४’ले चामत्कारिक व्यापार गर्दै सर्वाधिक कमाइको रेकर्ड कायम गर्‍यो ।

भदौमा प्रदर्शनमा आएको ‘झिंगेदाउ’ आकर्षक कमाई गर्दै हिट सावित भयो । असोजमा प्रदर्शनमा आएको ‘प्रेमगीत ३’ नेपालबाट वर्षको दोस्रो ठूलो कमाई गर्ने नेपाली फिल्म बन्यो । 

असोजमै प्रदर्शनमा आएको फिल्म ‘दुई नम्बरी’ले पनि आकर्षक कमाई गर्दै आफूलाई हिट फिल्मको सूचीमा राख्यो । 

कात्तिकको पहिलो शुक्रबार प्रदर्शनमा आएको फिल्म ‘के घर के डेरा’ नेपाली बजारबाटै लगानी सुरक्षित गर्न सफल रह्यो ।

कात्तिकको दोस्रो शुक्रबार (११ गते)देखि प्रदर्शनमा आएको फिल्म ‘महापुरुष’ले आकर्षक कमाई गर्न सफल भएको छ । 

नेपाली हलबाट १० करोड भन्दा बढीको व्यापार गरिसकेको फिल्म अझै पनि चलिरहेको छ । फिल्मले प्रदर्शनको छैठौं सातामा पनि राम्रो शो पाइरहेको छ । यो फिल्मले केही हलमा प्रदर्शनको गौरवमय ५१ दिन मनाउने अपेक्षा गरिएको छ । 

तर, ‘महापुरुष’पछि प्रदर्शनमा आएका नेपाली फिल्मको अवस्था भने निकै दयनीय देखिएको छ । त्यसयता हलमा चारवटा नेपाली फिल्म प्रदर्शनमा आइसकेका छन् । तर, चारवटै फिल्म दर्शकको खडेरीका कारण हलमा केही दिन पनि टिक्न सकेनन् । 

कात्तिकको १८ गतेबाट मल्टिस्टारर फिल्म ‘लाखे’ प्रदर्शनमा आयो । सौगात मल्ल, अर्पण थापा, अनुपविक्रम शाही, वर्षा राउतजस्ता कलाकारहरूको अभिनय रहेको फिल्म हलबाट केही दिनमै उत्रियो । 

मंसिरको २ गतेदेखि फिल्म ‘चोर र पुलिस’ प्रदर्शनमा आयो । बुद्धि तामाङ, धिरेन शाक्य, जयकिसन बस्नेतलगायतको अभिनय रहेको यो फिल्म पनि हलमा केही दिन पनि टिक्न सकेन । 

मंसिरको ९ गतेदेखि अर्को फिल्म ‘मिलन’ प्रदर्शनमा आयो । सलोन बस्नेत, कुशल शाह ठकुरी, शिल्पा थापा लगायतको अभिनय रहेको यस फिल्म पनि दर्शकको खडेरीका कारण टाट पल्टियो । 

गत शुक्रबारदेखि प्रदर्शनमा आएको अर्को फिल्म ‘पासो’ पनि धेरै हलबाट उत्रिसकेको छ । राजधानीका मल्टिप्लेक्स हलमा सोमबार यस फिल्मको शो देखिँदैन ।

‘महापुरुष’पछिका कुनै पनि नेपाली फिल्मले दर्शक तान्न नसकेको हल सञ्चालकहरू बताउँछन् । कतिपय फिल्म हेर्न एक जना पनि दर्शक नआएको हल सञ्चालकहरूको दाबी छ । 

राजधानीको ‘एफक्यूब सिनेमाज’का प्रबन्ध निर्देशक रामहरि कोइरालाले आफ्नो हलमा पछिल्लो नेपाली फिल्म ‘पासो’ हेर्न पहिलो दिन नै एकजना पनि दर्शक नआउँदा शो नै क्यान्सिल गर्नुपरेको लोकान्तरलाई बताए । 

कारण– जाडो र ‘वर्ल्ड कप’ कि फिल्म नै झूर ?

जाडोको समयमा फिल्मले अपेक्षित दर्शक नपाउने कतिपयले विश्लेषण गर्दै आएका छन् । यस वर्ष भने जाडो सिजनमा ‘वर्ल्ड कप’ले माहोल तताएको छ । 

जाडो र वर्ल्डकपको माहोलका कारण पनि यतिबेला प्रदर्शनमा आएका नेपाली फिल्मले दर्शक नपाएको कतिपयको विश्लेषण छ । 

कतिपय भने फिल्म नै झूर भएर दर्शकहरू हलसम्म नपुगेको बताउँछन् । वितरक करण श्रेष्ठ ‘क्रेजी’ जाडोका कारण भन्दा पनि वर्ल्डकपको माहोलले फिल्मलाई केही असर गरेको बताउँछन् । तर, हलमा दर्शक आउनु/नआउनुमा मुख्य कारण भने फिल्म स्वयं नै हुने उनको भनाइ छ ।

‘विश्वकपले केही हदसम्म असर गरेको हुनसक्छ । फिल्म नचलेपछि कतिपयले जाडोलाई पनि कारण बताउँदै आएका हुन्छन्,’ उनी भन्छन्, ‘चल्ने फिल्मले हुण्डरी आएको, पानी परिरहेको समयमा पनि राम्रो दर्शक पाउँछ । जाडो महिना, चिसो महिनामा नचल्ने भन्ने हुँदैन जस्तो लाग्छ ।’ 

हलमा दर्शक नपाएपछि समयलाई दोष दिने गरिएको भए पनि फिल्म नचल्नुमा धेरै कुराहरूले भूमिका खेल्ने उनको धारणा छ ।

‘फिल्मको प्रचार सामग्री कत्तिको नोटिस भएका छन्, आम दर्शकसम्म त्यो फिल्म कसरी पुगेको छ, त्यसले अर्थ राख्ला । फिल्म कस्तो बनेको छ भन्ने कुराले अर्थ राख्ला,’ उनी भन्छन्, ‘फिल्म चल्न सबै कुराहरू मिलेको हुनुपर्छ जस्तो लाग्छ ।’

हल सञ्चालकहरू भने फिल्म नै ‘झूर’ भएका कारण नचलेको हुन सक्ने बताउँछन् । 

एक हल सञ्चालकले लोकान्तरसँग भने, ‘महापुरुषमा केही भए पनि अझै दर्शक छन्, तर नयाँ नेपाली फिल्ममा दर्शक छैनन् । यसकारण, पछिल्लो समय प्रदर्शनमा आएका फिल्महरू आफैंमा राम्रो नभएका हुन् भन्न सकिन्छ ।’ 

ऋब धेरैको आशा फागुन महिनामा छ । उक्त महिनाका लागि ‘परदेशी २’, ‘फूलबारी’, ‘छक्का पञ्जा ४’, ‘छड्के २’ जस्ता आशा गरिएका फिल्महरूले प्रदर्शन मिति तोकेका छन् । त्यसअगाडिका केही नेपाली फिल्मले पनि दर्शक तान्न सक्ने अपेक्षा गरिएको छ ।