गएको वर्षको तुलनामा पाल्पामा यो वर्ष धान उत्पादनमा बढोत्तरी भएको देखिएको छ । धान लगाउने जग्गाको क्षेत्रफल बढेका कारण गत वर्षको तुलनामा यो वर्ष धान उत्पादन केही बढेको कृषि ज्ञान केन्द्र पाल्पाले जनाएको छ । 

गत वर्ष आठ हजार २०६ हेक्टर क्षेत्रफलमा धान खेती गरिए पनि यस वर्ष आठ हजार २१० हेक्टर जग्गामा धान लगाइएको ज्ञान केन्द्र पाल्पाको भनाइ छ । धान लगाउने क्षेत्रफल बढेकाले उत्पादनमा पनि बृद्धि भएको कृषि ज्ञान केन्द्र पाल्पाका सूचना अधिकारी मिलन गैरेले बताए ।

उनका अनुसार गत वर्षभन्दा यो वर्ष दुई प्रतिशतले धान उत्पादनमा बृद्धि भएको छ । गत वर्ष ३१ हजार ४२८ मेट्रिक टन धान उत्पादन भएकोमा यो वर्ष बढेर ३२ हजार १९ मेट्रिक टन पुगेको छ । 

विभिन्न रोगका कारण यो वर्ष धान उत्पादन घट्ने अनुमान गरिए पनि उत्पादन नघटेको गैरेले बताए । स्याहार्ने बेलामा रोगको आक्रमणले धानमा क्षति कम भएकाले उत्पादन बढेको केन्द्रकी प्रमुख कामना अधिकारीको बुझाइ छ ।  

केन्द्रका अनुसार पाल्पामा साँवा मन्सुली, युएस–३१२, शान्ति, खुमल, सिरिज, खुमल–३, सुख्खा धान, सावित्री तथा स्थानीय जातको धान खेती गरिदैआएको छ । पछिल्लो समय उन्नत तथा हाइब्रिड जातका धान लगाउने क्रम बढेको छ ।