नेपाली कांग्रेसका महामन्त्री गगन थापाले स्पष्टता, प्रतिबद्धता र सक्षम नेतृत्व अहिले देशले खोजिरहेको बताएका छन् । कांग्रेसले सही नेतृत्व गर्न सके पाँच वर्षपछिको चुनावमा कांग्रेसले ४० प्रतिशतभन्दा बढी लोकप्रिय मत पाउने उनको दाबी छ । 

मंगलवार विराटनगरमा गुरु घिमिरेले लेखेको ‘बाटो बिराएको राजनीति’ पुस्तक विमोचान कार्यक्रमलाई सम्बोधन गर्दै थापाले अहिलेको गठबन्धनबाटै सरकार बन्ने भए पनि सरकार के को लागि भन्ने महत्वपूर्ण भएको बताएका हुन् । 

‘गठबन्धनको सरकार बन्नेमा कुनै सन्देह छैन, हामीले चाहेको सरकार मात्र हो ? एउटा परिदृष्य गठबन्धनको सरकार बन्छ । नेताहरू भित्र–भित्र तमसुक गर्छन्, पछि गएर बबण्डर बन्छ । सरकार बन्छ, उद्धेश्य हुँदैन, संवेदना हुँदैन भने के अर्थ हुन्छ ?’, थापाले प्रश्न गरे । 

उनले एउटा स्पष्टता, प्रतिबद्धतासहित क्यारेक्टर भएको लिडरसिप भएको सरकारले मात्र देशको समस्या समाधान गर्न सक्ने बताए । ‘निर्वाचित सरकारसँग शक्ति, समय र स्रोतको सीमा हुन्छ । खाली देश बिग्रियो भन्ने, हामी बदल्छौँभन्दा बाबुहरूको उमेर कति भनेर सोध्ने ?’, थापाले भने । 

महामन्त्री थापाले कांग्रेस संसदीय दलको निर्वाचन लड्ने बताउँदै आइरहेका छन् । उनले पार्टीभित्र सुधारका एजेण्डा लागू गर्न डा. शेखर कोइरालासँग आफू एकै ठाउँमा रहेको बताए । ‘पार्टी महाधिवेशनमा विचार र शैलीका कारण हामी शेखर कोइरालासँग उभियौँ, हाम्रो विश्वास डगमगाएको छैन । पार्टीभित्र व्यापक सुधारका एजेण्डामा काम गर्छौँ’, उनले भने । 

गगन अघि बोलेका कोइरालाले पार्टीको लोकप्रिय मत घटेकोमा चिन्ता व्यक्त गरेका थिए । ‘मलाई विश्वास छ, नेपाली कांग्रेसको घटेको लोकप्रिय मत बढाउन सकिन्छ । सरकार यसरी चलाउने भन्नसक्यौँ भने गुमाएको लाखौँ मत आउँछ । अर्को चुनावमा ४० प्रतिशतभन्दा माथिको पार्टी बन्नसक्छ’, थापाले भने । 

लोकप्रिय मत बढाउनको लागि पार्टीको आकर्षण बढाउन जरुरी रहेको उनले बताए । ‘कांग्रेसको प्रत्येक सदस्यले सोच्ने बेला आएको छ, पार्टीप्रति र देशप्रतिको चिन्ता प्रत्येक कार्यकर्तामा छ । सही ठाउमा उभिएर निर्णय गरौँ’, थापाले भने । 

लोकान्तर डट्कममा प्रकाशित लेखहरूको संग्रह ‘बाटो बिराएको राजनीति’ लोकान्तर सञ्चार प्रालिले प्रकाशित गरेको हो । कांग्रेस महामन्त्री थापाले लोकतन्त्रको चिन्ता हुने सबैले गुरु घिमिरेको पुस्तक पढ्नैपर्ने बताए ।