‘लोकान्तर राउण्ड अप’मा पाठकवृन्दलाई स्वागत छ ।  सधैँझैँ आज पनि हामी बितेका २४ का मुख्यमुख्य घटनाक्रमसहित उपस्थित भएका छ । 
मंसिर ४ गते सम्पन्न प्रतिनिधिसभा तथा प्रदेशसभा सदस्य निर्वाचनको प्रत्यक्ष र समानुपातिकतर्फको दुवै मतगणना सकिएको छ । निर्वाचन आयोगका अनुसार मतगणना सकिएसँगै थ्रेस होल्ड कटाएर सात राजनीतिक दल राष्ट्रिय दल बनेका छन् । अध्यक्ष माधवकुमार नेपाल नेतृत्वको नेकपा (एकीकृत समाजवादी) राष्ट्रिय दल हुनबाट बञ्चित भएको छ । 

समानुपातिकतर्फको सबै मत गणना सकिएपछि निर्वाचन आयोग दलले प्राप्त गर्ने सिट बाँडफाँटमा जुटेको जनाएको छ। आयोगका सहायक प्रवक्ता ऋषिराम भुसालका अनुसार समानुपातिकतर्फको मतगणना सकिएकाले दलले प्राप्त गर्ने सिट बाँडफाँटको काम बुधबार टुंगिने छ । एक करोड ५ लाख ६० हजार ६७ कुल मतको गणना भएको आयोगले जनाएको छ । दलहरुले प्राप्त गरेको मत आयोगले आफ्नो वेवसाइटमा प्रविष्ट गरिसकेको छ । 
००००
आयोगमा दलहरूले बुझाएको समानुपातिकका उम्मेदवारको बन्दसूचीका आधारमा पाउने सिट संख्यासहित समावेशी समूह मिलाएर नाम सिफारिसका लागि दलहरूलाई पत्राचार गर्नेछ । दलहरूले प्रतिनिधि सभातर्फ ७ दिन र प्रदेश सभातर्फ ३ दिन समय पाउनेछन् ।

दलहरूबाट नामावली सिफारिस भइसकेपछि आयोगले मंसिर २६ गतेभित्रमा निर्वाचन परिणामको प्रतिवेदनसहित राष्ट्रपतिसमक्ष प्रतिवेदन बुझाउने जनाइएको छ ।
००००
सरकारले गाडी, मोबाइल, मदिरा र मोटरसाइकलको आयात प्रतिबन्ध फुकुवा गर्ने निर्णय गरेको छ । मंगलवार बसेको मन्त्रिपरिषद् बैठकले उक्त सामग्रीहरूको आयातमा यसअघि लगाइएको प्रतिबन्ध फुकुवा गर्ने निर्णय गरेको एक मन्त्रीले जानकारी दिए । 

उक्त आयात फुकुवासम्बन्धी निर्णय आगामी पुसदेखि लागू हुने बैठकले निर्णय गरेको छ । उक्त वस्तुहरूको आयातमा लगाइएको प्रतिबन्ध फुकुवा गर्नुपर्ने प्रस्ताव उद्योग, वाणिज्य तथा आपूर्तिमन्त्री दिलेन्द्रप्रसाद बडूले मन्त्रिपरिषदमा राखेका थिए ।

यसैबीच मन्त्रिपरिषद् बैठकमा अहिलेको मौद्रिक नीतिका साथै बैंकहरुले तोकेको ब्याजदरले उद्योगी व्यवसायीलाई समस्या भएकाले तत्काल निकास निकाल्नुपर्ने विषय उठेको छ ।
मङ्गलबार बसेको मन्त्रिपरिषद् बैठकमा गृहमन्त्री बालकृष्ण खाण, अर्थमन्त्री जनार्दन शर्मा र उद्योग, वाणिज्य तथा आपूर्तिमन्त्री दिलेन्द्रप्रसाद बडूले अहिलेको मौद्रिक नीति र बैंकहरूले तोकेको ब्याजदरले अर्थतन्त्रमा गम्भीर समस्या आउने भन्दै सरकारले हस्तक्षेप गर्नुपर्ने बताएका हुन् ।
००००
प्रतिनिधिसभा तथा प्रदेशसभा सदस्य निर्वाचनमा भाग लिएका राजनीतिक दल र उमेदवार निर्वाचन खर्चको विवरण बुझाउन थालेका छन् । 
निर्वाचन खर्च बुझाउने क्रममा प्रधानमन्त्री एवं नेपाली कांग्रेसका सभापति शेरबहादुर देउवाले प्रतिनिधिमार्फत चुनावी खर्च बुझाएका छन् । प्रधानमन्त्री देउवाले आफ्ना प्रतिनिधि पार्टीका सहसचिव प्रेमबहादुर महरमार्फत खर्च विवरण पेश गरेका हुन् । उनले निर्वाचनमा रु २६ लाख १२ हजार खर्च गरेको विवरण निर्वाचन कार्यालयमा पेस गरेको सहसचिव महरले जानकारी दिए ।

यसैगरी नवलपरासीमा शशांक कोइरालासहित ४५ उम्मेदवारले निर्वाचन खर्च विवरण बुझाएका छन् । दुई सङ्घीय निर्वाचन क्षेत्र र चार प्रदेशसभा निर्वाचन क्षेत्र रहेको जिल्लामा ६८ जनाले उम्मेदवारी दिएका थिए ।
००००
रुपन्देही २ मा पुनः मतगणनाको माग गर्दै सर्वोच्च अदालतमा रिट दर्ता भएको छ । मंसिर ४ गते सम्पन्न भएको मतदानको मतगणना फेरि गर्नुपर्ने माग गर्दै राष्ट्रिय स्वतन्त्र पार्टीका प्रतिनिधि सभा सदस्य पदका उम्मेदवार गणेश पौडेलले मंगलवार सर्वोच्च अदालतमा रिट निवेदन दिएका हुन् ।
००००
नेकपा एकीकृत समाजवादीका महासचिव डा। बेदुराम भुसालले गण्डकी प्रदेशका युवा तथा खेलकुदमन्त्री राजीव गुरुङ उर्फ दीपक मनाङेबाट सिक्नुपर्ने बताएका छन् । मंगलवार काठमाडौंको तिनकुनेस्थित पार्टी केन्द्रिय कार्यालयमा स्वागत गर्दै उनले प्रदेशमन्त्री भएर गुरुङले राम्रो काम गरेको दाबी गरे । उनले मनाङेको कामबाट सबैले सिकेर अघि बढ्नुपर्ने बताए ।  
००००
रुपन्देहीमा पर्ने सीमामा भारतले एकलौटी तरिकाले पर्खाल निर्माण गर्न लागेपछि नेपाली प्रशासनले त्यसमा हस्तक्षेप गरेको छ । 
रुपन्देहीको सिद्धार्थनगर नगरपालिका वडा नम्बर १ पक्लिहवा नजिकै भारतले एकलौटीरूपमा पर्खाल निर्माण सुरु गरेको छ । दशगजासँगै जोडिएर एकलौटीरूपमा पर्खाल निर्माण गर्न लागेकाले स्थानीय प्रशासनले यसमा आपत्ति जनाएको छ ।
००००
राष्ट्रपति विद्यादेवी भण्डारीसँग जनमत पार्टीका अध्यक्ष डा सिके राउतले भेट गरेका छन् । शीतलनिवासस्थित राष्ट्रपति कार्यालयमा मंगलबार भएको भेटमा समसामयिक राजनीतिक विषयमा उनीहरूबीच छलफल भएको राष्ट्रपति भण्डारीको प्रमुख स्वकीय सचिव डा भेषराज अधिकारीले जानकारी दिए ।
००००
नेपाली कांग्रेसका महामन्त्री गगन थापाले प्रदेश सभाले पाँच वर्षमा आफ्नो औचित्य पुष्टि गर्न नसके जनताले सडकबाट चाहिँदैन भनेर फैसला गर्ने बताएका छन् ।
मंगलवार विराटनगरमा गुरु घिमिरेले लेखेको पुस्तक ‘बाटो बिराएको राजनीति’ विमोचन कार्यक्रमलाई सम्बोधन गर्दै थापाले प्रदेश संरचनाको लागि यो पाँच वर्षे कार्यकाल महत्वपूर्ण हुने बताएका हुन् ।
००००
यसैगरी नेपाली कांग्रेसका नेता डा शेखर कोइरालाले प्रत्यक्षतर्फ २३ बाट ५७ सीट जिते पनि कांग्रेसको पपुलर भोट घट्नु चिन्ताको विषय भएको बताएका छन् । माओवादीको जगजगी रहेको बेलामा पनि ३२ प्रतिशत रहेको पपुलर भोट घट्नु गम्भीर विषय भएको उनले बताए ।
००००
एक जिल्ला न्यायाधीशमाथि वैवाहिक बलात्कारको आरोप लागेको छ । पीडित भनिएकी महिलाले प्रहरीले उजुरी लिन नमानेको भन्दै राष्ट्रिय महिला आयोगमा उजुरी गरेकी छन् ।
उजुरीकर्ता ती न्यायाधीशकै कान्छी श्रीमती रहेको पाइएको राष्ट्रिय महिला आयोगकी प्रवक्ता चमिला भट्टराईले जानकारी दिइन् ।
पीडित भनिएकी महिलाले न्याय परिषदमा समेत उजुरी गरेकी छन् । न्याय परिषद सचिवालयका प्रवक्ता मानबहादुर कार्कीले पनि उजुरी आएको पुष्टि गरेका छन्।
००००
आज नेपाल स्टक एक्सचेन्ज (नेप्से) परिसूचक चार दशमलव ८७ अंकले घटेर एक हजार नौ सय ३३ दशमलव ८८ मा कायम भएको छ । नेप्से परिसूचकसँगै कारोबार रकम पनि घटेको छ । 
आज दुई सय ३८ वटा कम्पनीको २५ लाख ८१ हजार चार सय २५ कित्ता शेयर रु ९६ करोड ५२ लाख १० हजार आठ सय ९९ मा खरिदबिक्री भएको छ ।