म्युनिसिपल कर्पोरेसन अफ दिल्ली (एमसीडी) को निर्वाचनको मतगणना अन्तिम चरणमा पुग्दा आम आदमी पार्टीले भारतीय जनता पार्टीमाथि अग्रता बनाएको छ । 

चार घन्टाको मतगणनामा दुवै पक्षबीच कडा प्रतिस्पर्धा भए पनि अन्तिममा आप अघि बढेको हो । 

एमसीडीका कुल २५० वार्डका लागि डिसेम्बर ४ मा मतदान भएको थियो । चुनावमा जम्मा ५० प्रतिशत मत खसेको थियो ।  

यस निर्वाचनलाई आप, भाजपा र कांग्रेसबीचको त्रिपक्षीय भिडन्तका रूपमा हेरिएको थियो । तर कांग्रेसले दोहोरो अंकमा सीट ल्याउन समेत धौधौ परेको देखिँदा यो द्विपक्षीय प्रतिस्पर्धामा सीमित भएको छ । 

निर्वाचनलगत्तै प्रकाशित एक्जिट पोलमा आपले प्रचण्ड बह्मत ल्याएर एमसीडीमा पहिलोपटक शासन चलाउने अनुमान गरिएको थियो । 

तर भाजपा पनि मतगणनामा कमजोर देखिएको छैन । 

आपले सरकार बनाउन सक्ने सम्भावना मतगणनाले औंल्याएपछि आप समर्थकहरू खुशियाली मनाउन थालेका छन् ।