नेपाली कांग्रेसका नेता तथा काठमाडौं निर्वाचन क्षेत्र नं. ५ का प्रतिनिधि सभा सदस्य प्रदीप पौडेलले चक्रपथ विस्तारको कामलाई छिटो अगाडि बढाउन निर्देशन दिएका छन् । बुधवार एकान्तकुना ललितपुरस्थित काठमाडौं चक्रपथ सुधार योजनाको कार्यालयमा पुगेर उनले चक्रपथ विस्तारको सम्बन्धमा भइरहेको कामबारे जानकारी लिए । 

नेता पौडेलले चक्रपथ विस्तारको काममा ढिलासुस्ती हुँदा आम नागरिकलाई समस्या परिरहेको भन्दै छिटोभन्दा छिटो बाँकी रहेका कामलाई अगाडि बढाउन निर्देशन दिए । उनले विष्णुमति र सामाखुशी खोलामा वर्षातको समयमा पानी बढी भएर त्यस क्षेत्रमा डुबानको समस्या हुने गरेको भन्दै सडक विस्तारको क्रममा ढल निकासको समस्यालाई पनि समाधान गर्न आग्रह गरे । उनले चक्रपथ विस्तार गर्दा ढल निकासको समस्यालाई पनि समाधान हुनेगरी गर्नुपर्ने बताए । 

‘रिङरोड वरिपरि ५० मिटरभित्र सामानहरू हटाउन, सफा गर्न १५ दिने सूचना जारी गरेको छ यो कार्यालयले । तोकिएको समयभित्र उहाँहरूले सफा गर्ने भन्नुभएको छ । विष्णुमति खोला, सामाखुशी खोलालगायत थुप्रै खोलाहरू वर्षातमा पानी बढेर बस्ती नै डुबानमा पर्ने स्थिति छ । ढलको क्षमता असाध्यै कम भएको कारणले बस्ती डुबानमा पर्ने स्थिति छ । सडक निर्माणको क्रममा जुन ढल निकासको प्रबन्ध हुन्छ, त्यो प्रबन्ध अलि बढी क्षमताको होस् । अहिलेको समस्या हल हुनेगरी होस् । ढल निकासको समस्यालाई रिङ रोड विस्तारको क्रममा ध्यान दिएर समाधान गरियोस् भनेर हामीले कुरा ग¥यौँ’, पौडेलले भने । 

नेता पौडेलले स्थानीय समस्याहरूको समाधान गर्दै दोस्रो चरणको कलंकीदेखि वसुन्धरासम्मको सडक विस्तारको काम र तेस्रो चरणको बसुन्धरादेखि चाबहिलसम्मको कामलाई पनि तत्काल शुरु गर्न आग्रह गरे । उनले अर्थ मन्त्रालय, भौतिक पूर्वाधार मन्त्रालयलगायतका सरोकारवाला निकायहरूसँग पनि आफूहरूले कुरा गर्ने भन्दै चक्रपथ विस्तारलाई छिटो अगाडी बढाउने परिस्थिति निर्माण गर्न लागि पर्ने बताए ।