युक्रेनको राजधानी किएभका मेयर भिताली क्लित्स्कोले ऊर्जा संरचनामा रुसी आक्रमण जारी रहेमा जाडोमा सर्वविनाश हुने चेतावनी दिएका छन् । 

ऊर्जा संरचना नष्ट हुँदै जाँदा विद्युत्, जल र न्यानोपन गुम्दै गएको अनि मानिसहरूलाई घरमा बस्नै असम्भव हुने स्थिति आउन लागेको उनको भनाइ छ ।

‘तर हामी लडिरहेका छौं र यस्तो स्थिति नआओस् भनी गर्न सक्ने जति सबै काम गरिरहेका छौं,’ उनले बताए । 

क्लित्स्कोका अनुसार, किएभका १५२ जना बासिन्दाहरू रुसी आक्रमणमा मारिएका छन् भने ६७८ वटा भवन भत्किएका छन् । 

तर रुसले युक्रेनको विद्युत् ग्रिडमा लगातार क्षेप्यास्त्र आक्रमण गरिरहँदा किएभले थप समस्या बेहोर्नुपर्ने उनले थपे । 

किएभका ३६ लाख बासिन्दाहरूलाई राख्न सक्ने न्यानो आश्रयस्थल नभएको क्लित्स्कोले बताए । परिस्थिथि थप बिग्रेमा मानिसहरू सुरक्षित स्थानतर्फ जानका लागि तयार हुनुपर्ने उनले बताए । 

१५ सय वर्ष पुरानो शहरमा आगामी दिनहरू निकै कठिन नहुने उनको भनाइ छ । 

तापक्रम माइनस १५ डिग्री सेल्सियस पुग्दा सेन्ट्रल हीटिङको अभाव हुन सक्ने सम्भावना उनले औंल्याए ।

‘बाहिर तापक्रम निकै घटेको बेलामा विद्युत् आपूर्तिको अभाव भइरहेमा भवनबाट पानी बाहिर निकाल्नुपर्ने हुन सक्छ,’ उनले थपे । 

‘त्यसो नगर्दा पानी जम्छ र जल आपूर्ति सञ्जाल नै भत्किन्छ,’ उनले भने, ‘त्यसपछि भवनहरू बेकामे हुन्छन् ।’

क्लित्स्कोले स्थानीय बासिन्दाहरूलाई खाद्यान्न र पानीको जोहो गर्न आग्रह गरेका छन् । भवन तातो बनाउनै नसकिएमा कपडा र कागजात तयारी अवस्थामा राख्न पनि उनले स्थानीयहरूलाई आग्रह गरेका छन् ।