नेपाली कांग्रेसका नेता विजयकुमार गच्छदारले ठूला २ दल कांग्रेस र एमाले मिलेर सरकार बनाउनुपर्ने बताएका छन् ।

विराटनगरमा पत्रकारहरूसँग कुराकानी गर्दै नेता गच्छदारले चुनावले राजनीतिक अस्थिरता निम्त्याएकाले स्थिर सरकार बनाउनुपर्ने बताए । एमाले र कांग्रेस मिलेर स्थिर सरकार बनाउनुपर्छ भन्ने पक्षमा आफू रहेको उनले बताए । 

कांग्रेस र एमालेको सरकार बनाउन आफूले पहल गर्ने नेता गच्छदारको भनाइ छ । ‘२०४८ सालयता बहुमत भएकै सरकारहरू टिकेनन्,’ उनले भने, ‘अब स्थिर र गतिशील सरकार बनाउने हो भने कांग्रेस–एमाले मिल्नुको विकल्प छैन ।’ जनताको अभिमतले पनि एमाले–कांग्रेस मिल्ने खालको आएको उनले बताए । 

‘५ वर्षसम्म कसैले हल्लाउने खालको सरकार नबनाउने भन्ने पक्षमा म छु । त्यही भएर पनि जनताले मत दिएर बनेका यी २ ठूला दल मिल्नुको विकल्प छैन भन्ने लाग्छ,’ उनले भने । 

महामन्त्री गगनकुमार थापाले संसदीय दलको नेतामा दाबी गरिरहेका बेला गच्छदारले पुस्तान्तरण अहिले नै सम्भव नभएको दाबी गरे । सभापति शेरबहादुर देउवाले नचाहेसम्म असम्भव रहेको उनले बताए । ‘पुस्तान्तरण बिस्तारै हुँदै जान्छ,’ उनले भने ।

जसपा अध्यक्ष उपेन्द्र यादवका कारण देशमा अस्थिरता आउन लागेको समेत उनले आरोप लगाए । उनले जसपाले एमालेसँग गएर मिलेर अस्थिरता ल्याउन खोजेको आरोप लगाएका छन् ।

‘कांग्रेस सहितको गठबन्धनमा भएको भए सत्ता गठबन्धनको बहुमत पुग्न सक्थ्यो,’ उनले भने, ‘उहाँ एमालेतिर मिल्न जानुभयो । उहाँले पनि हार्नुभयो, मैले पनि हारें ।’

जसपा अध्यक्ष उपेन्द्र यादवले ४ हजार मत सूर्यमा हाल्न लगाएका कारण आफूले पराजय भोग्नुपरेको उनले बताए । एमाले अध्यक्ष केपी शर्मा ओलीको उदाहरण दिँदै उनले भने, ‘२०६४ सालमा उहाँले हार्नुभयो तर अहिले प्रचण्ड बहुमतले जित्नुभयो । मत ६ पटक जितेर एकपटक हारेको छु । त्यसैले आतिनुपर्ने अवस्था छैन ।’ 

उनले अझै १० वर्ष राजनीतिमा सक्रिय हुने बताए । २०८९ सालसम्म आफू सक्रिय हुने उनले बताए । 

सुनसरीको ३ नम्बर निर्वाचनमा एमालेकी भगवती चौधरीसँग प्रतिनिधिसभा चुनाव हारेका गच्छदारले १० वर्षसम्म राजनीतिमा सक्रिय हुन पुनः चुनावमा उठ्ने संकेत समेत गरेका छन् ।