जनमत पार्टीले सीके राउतलाई दियो सरकारबारे निर्णय गर्ने जिम्मेवारी

प्रतिनिधिसभामा ६ सिट रहेको सीके राउत नेतृत्वको जनमत पार्टी सरकारमा सहभागी हुन सकारात्मक बनेको छ । बिहीबार बसेको जनमत पार्टीको केन्द्रीय समिति बैठकमा सदस्यहरुले सरकारमा जानुपर्ने धारणा राखेका थिए । 
सरकारमा जानेबारे सबैजसो सदस्यले सकारात्मक प्रतिक्रिया दिएसँगै राजधानीको तपोवन होटलमा बसेको बैठकले परिस्थिति हेरेर सरकारमा जानेबारेमा निर्णय गर्ने अधिकार अध्यक्ष राउतलाई दिने निर्णय गरेको महासचिव चन्दन सिंहले जानकारी दिए । 

‘सरकारमा जानबारे परिस्थिति हेरेर आवश्यक निर्णय हुन्छ । बैठकले सरकारमा जानेबारे थप निर्णय गर्ने अधिकार अध्यक्षजीलाई दिएको छ’, सिंहले लोकान्तरसँग भने । सोहीअनुसार दलहरुसँग छलफल गरिने पनि उनको भनाइ छ । 

प्रतिनिधिसभामा प्रत्यक्षतर्फ राउत निर्वाचित भएका थिए भने समानुपातिकतर्फ ५ सांसद सो पार्टीले पाएको छ । पार्टीको बैठकले समानुपातिक सांसद बन्नेहरुको नाम अनुमोदन गरेको पनि सिंहले जानकारी दिए । निर्वाचन आयोगमा बुझाइएको क्लस्टरअनुसारको नामलाई नै बैठकले अनुमोदन गरेको उनको भनाइ छ ।  बैठकले जनमत पार्टीलाई मत दिने आम मतदातासहित निर्वाचन सफल बनाएकामा सम्बन्धित निकायलाई धन्यवाद पनि ज्ञापन गरेको छ।