दाङमा सञ्चालित जिल्ला तर्फको सर्वाधिक पुरस्कार राशीको फुटवल प्रतियोगिताको उपाधि टाइगर युवा क्लव तुलसीपुरले जितेको छ । स्व. मीनबहादुर केसी स्मृति कप फुटबल प्रतियोगिता २०७९ जितेर सो क्लवले नगद एक लाख ३० हजार हात पारेको हो ।

प्रतियोगिता आयोजक टिम रहेको टाईगर युवा क्लवले उपाधीसँगै नगदसहित कप, मेडल तथा प्रमाणपत्र हात पारेको छ । प्रतियोगितामा उपबिजेता ज्ञानज्योती फुटवल क्लव बनेको छ । सो क्लवले नगद ६५ हजारसहित कप, मेडल तथा प्रमाणपत्रमा चित्त बुझायो । 

तुलसीपुर उपमहानगरपालिका –३ दमारगाउँको आयोजनामा भएको प्रतियोगिताको बिहीबार भएको फाइनल खेलमा ज्ञानज्योती फुटबल क्लब तुलसीपुर–६ लाई सुन्यका विरुद्ध २ गोल अन्तरले पराजित गर्दै टाईगर युवा क्लबले उपाधी जितेको थियो । 

फुटबल खेलको विकास, प्रवर्धन र प्रतिभावान खेलाडी उत्पादन गर्ने उद्देश्यसाथ प्रतियोगिता आयोजना गरिएको आयोजकले जनाएको छ । प्रतियोगितामा दाङलगायतका १४ टिमको सहभागिता थियो ।