तानसेन–तम्घास सडक दैनिक १० घण्टा बन्द हुने भएको छ ।

बिहीवारदेखि १५ दिनसम्म १० घण्टा सडक बन्द गरेर काम गरिने भएको छ । 

तानसेन–तम्घास सडकखण्डअन्तर्गत पर्ने पाल्पाको रिब्दिकोट गाउँपालिकाको सिरुखर्क माल्मुल क्षेत्रमा सडक फराकिलो गर्नका लागि काम थालिएको सडक डिभिजन कार्यालय पाल्पाका प्रमुख प्रदीप निरौलाले जानकारी दिए ।

‘अप्ठ्यारो बाटोलाई फराकिलो बनाउन केही समय सडक बन्द गरेर कामको शुरूआत गरिएको छ,’ उनले भने, ‘एम्बुलेन्स, शववाहन लगायत अतिआवश्यक सवारीसाधनलाई अवस्था हेरेर ओहोरदोहोर गर्न दिइनेछ, हामीले तोकिएको समयभन्दा चाँडो सम्पन्न गर्ने गरी कामलाई तीव्रता दिएका छौं ।’

माल्मुम क्षेत्रमा करीब २ किलोमिटर साँघुरो, अप्ठ्यारो बाटोलाई फराकिलो बनाउने योजनाअनुरूप कामको थालनी गरिएको सडक डिभिजन कार्यालय पाल्पाका इन्जिनीयर निरञ्जन अर्यालले बताए । उनका अनुसार यस क्षेत्रमा हाल दैनिक ४० कामदार काम गर्दैछन् । साना सवारीसाधनका चालकले वैकल्पिक मार्गको रूपमा जोर्ते–चण्डीभन्ज्याङ सडक प्रयोग गर्न सक्नेछन् ।  

सिरुखर्क–माल्मुल क्षेत्रमा बिहीवारदेखि आउँदो पुस ७ गतेसम्म बिहान ५ बजेदेखि ९ बजेसम्म, दिउँसो १२ बजेदेखि ३ बजेसम्म र साँझ ७ बजेदेखि १० बजेसम्म सडक बन्द रहने सडक डिभिजन कार्यालयले जनाएको छ । सडकखण्ड भएर पाल्पा, गुल्मी, बुटवल, बागलुङ, पर्वत लगायतका यात्रु दैनिक ओहोरदोहोर गर्दछन् ।