२६ जेठ २०८३, मंगलबार
रुसको खतरनाक जिर्कोन हाइपरसोनिक क्षेप्यास्त्र जडान गरिएको जंगी जहाजले जनवरी महिनाबाट नियमित कम्ब्याट ड्युटी थाल्ने रुसका राष्ट्रपति भ्लादिमिर पुटिनले बताएका छन् ।
बुधवार देशका शीर्ष रक्षा अधिकारीहरूसँगको बैठकमा पुटिनले यसको खुलासा गरेका हुन् ।
‘जनवरी महिनादेखि एड्मिरल गोर्शकोभ फ्रिगेट अत्याधुनिक तथा अद्वितीय हाइपरसोनिक क्षेप्यास्त्रका साथ युद्धका लागि तयार अवस्थामा प्रवेश गर्नेछ,’ पुटिनले बताए ।
उक्त बैठकमा रक्षामन्त्री सर्गे शोइगुले सरमत अन्तर्महादेशीय ब्यालिस्टिक क्षेप्यास्त्रहरू रुसको रणनीतिक क्षेप्यास्त्र फौजले तैनाथ गरिरहेको बताए ।
नयाँ हाइपरसोनिक क्षेप्यास्त्रलाई आधिकारिक रूपमा ३एम२२ जिर्कोन भनिन्छ । विगत केही वर्षयता यसको सक्रिय परीक्षण गरिएको छ ।
एड्मिरल गोर्शकोभ रुसको नर्दन फ्लीटमा रहेको आधुनिक क्षेप्यास्त्र फ्रिगेट हो । यसले अनेकौं नयाँ क्षेप्यास्त्रहरूको परीक्षण प्रक्षेपण गरिसकेको छ ।
जिर्कोन हतियारका बारेमा थप जानकारी उपलब्ध छैन । तर यो ९ माख अर्थात् ११ हजार किलोमिटर प्रतिघन्टाको गतिमा उड्न सक्ने बताइएको छ । त्यस्तो अवस्थामा यसलाई शत्रुले रोक्न सक्दैन ।
