सरुवा भएर जाँदा बेडबिस्तरा बोक्नुपर्ने बाध्यता अन्त्य गर्ने सशस्त्र प्रहरी बलका प्रहरी महानिरीक्षक (आईजीपी) राजु अर्यालले बताएका छन् ।

सोमवार सशस्त्र प्रहरीको २२औं स्थापना दिवसको उपलक्ष्यमा बोल्दै उनले आगामी दिनमा बिस्तरा बोकेर जाने बाध्यताको अन्त्य गर्ने बताए ।

‘सरुवा भएर जाँदा बेडबिस्तरा बोकेर जाने बाध्यात्मक व्यवस्था हटाउने कार्य २०७९ भित्रै सम्पन्न गरिन्छ,’ आईजीपी अर्यालले स्थापना दिवसको समारोहमा भने, ‘फिल्डमा अप्ठ्याराहरू छन् । त्यसका बाबजुत पनि काम गर्दै आएको सशस्त्र प्रहरी बलमा आगामी दिनमा तल्ला तहका कर्मचारीहरुलाई बेडबिस्तरा बोक्नुपर्ने अवस्थाको अन्त्य गर्छु ।’

उनले आचरणमा आएको विचरणलाई सुधार्न पनि निर्देशन दिए । व्यावसायिकता, इमान्दारिता, बफादारिता र आचरण सुधारलाई मूलमन्त्र बनाएर काम गर्न उनले निर्देशन दिए । ‘त्यसका बाबजुद, प्रत्येक कमाण्डरले नैतिकवान भएर असल आचरण प्रदर्शन गर्नुपर्छ । स्रोतसाधनको सीमितताको निहुँमा कर्तव्यबाट विमुख हुने छुट हामीमध्येका कसैलाई छैन,’ आईजीपीले भने ।

हिमाली क्षेत्रका सीमा नाकामा खटिएका सशस्त्र प्रहरीका कर्मचारीलाई मौसम अनुसारको लत्ताकपडाको व्यवस्था गर्नका लागि प्रक्रिया अगाडि बढाएको आईजीपीले बताएका छन् ।