बागलुङमा स्ट्रबेरीको व्यावसायिक उत्पादन थालिएको छ ।

गत वर्ष तमानखोला गाउँपालिका–२ कटेरीका ४९ वर्षीय चूडामणि छन्त्यालले परीक्षणका लागि लगाएको स्ट्रबेरी बेचेर २ लाख रुपैयाँ आम्दानी गरे । उनले उत्पादन गरेको स्ट्रबेरी पोखरामा बिक्री भएको थियो ।  

अहिले जैमिनी नगरपालिका–१० रांखानीका केदार आचार्यले आफ्नै आचार्य जैविक कृषि फर्ममा समेत पहिलो पटक स्ट्रबेरीको खेती थालेका छन् ।

पछिल्लो समय बागलुङमा छन्त्याल र आचार्यले स्ट्रबेरीको व्यावसायिक खेती थालेका छन् ।

छन्त्यालले बागलुङमा स्ट्रबेरी खेती गरेको खबर पाएपछि उनकै सल्लाहमा पहिलोपटक यस वर्ष १ हाइटेक टनेलमा स्ट्रबेरी खेती थालेको रांखानीका कृषक केदार आचार्यले बताए । उनले गत वर्षदेखि स्ट्रबेरीको व्यावसायिक खेती थालिएको जनाउँदै बागलुङका लागि नयाँ फल रहेको बताए ।

उनले आफूले परीक्षणका लागि लगाएका ३०० स्ट्रबेरीका बिरुवाले उत्पादन दिन थालेको जानकारी दिए ।

‘५ वर्षदेखि कृषि कर्ममा तल्लीन छु, नयाँ–नयाँ फलफूल तथा तरकारीको परीक्षण उत्पादन समेत गर्दै आएको छु, यहाँ स्ट्रबेरीको राम्रो सम्भावना देखें, स्ट्रबेरी खेतीको विषयमा खोजी गर्दा तमानखोलामा यसको व्यावसायिक उत्पादन भएको पत्ता लगाएर यस वर्षदेखि खेती थालेको हुँ,’ आचार्यले भने, ‘स्ट्रबेरी अन्य फलफूलभन्दा सजिलै उत्पादन गर्न सकिने र राम्रो मूल्य पाउने देखियो, अर्को वर्ष अझै बृहत तरिकाले उत्पादन गर्ने लक्ष्यमा छु ।’