सूर्य नेपाल गल्फ टुरअन्तर्गत २०२२-२३ सिजनको तेस्रो प्रतियोगिता सूर्य नेपाल एनपीजीए म्याच प्लेको क्वाटरफाइनल समीकरण पूरा भएको छ। 

नेपाल नम्बर एक प्रोफेसनल गल्फर शुक्र बहादुर राई, दोस्रो वरीयताका साविक विजेता भुवन नगरकोटी तथा रबि खड्का, रमेश अधिकारी, धन बहादुर थापा, जयराम श्रेष्ठ, भुवन कुमार रोक्का र दिनेश प्रजापतीले पहिलो चरणको खेल जित्दै अन्तिम आठमा स्थान बनाए। 

शुक्रले २०औं वरीयताका टंकबहादुर कार्कीलाई ५-४ ले हराए। शुक्रले क्वाटर्फाइनलमा १०औं वरीयताका भुवन कुमार रोक्कालाई प्रतिद्वन्द्वीका रूपमा भेट्टाएका छन्। भुवनले नवौं वरीयताका रामे मगरलाई २-१ ले माथ दिए।

दोस्रो वरीयताका भुवन नगरकोटीले भने १९औं वरीयताका सञ्जोक मोक्तानलाई २-१ ले हराए। उनले अब आठौं वरीयताका धनबहादुर थापासँग खेल्नेछन्।

धनले पहिलो चरणमा ११औं वरीयताका धरानका बलभद्र राईलाई ३-२ ले पराजित गरे।

यसैगरी तेस्रो वरीयताका जयराम श्रेष्ठले क्वाटरफाइनलमा पुग्ने क्रममा १७औं वरीयताका कृष्णमान राजबाहकलाई अन्तिम होलमा (१अप) पराजित गरे।

उनले अब सातौं वरीयताका दिनेश प्रजापतिसँग खेल्नेछन्।

दिनेशले पनि अन्तिम होलमा १२औं वरीयताका सूर्यप्रसाद शर्मालाई पराजित गरे। अर्को खेलमा पाँचौ वरीयताका रवि खड्काले १५औं वरीयताका प्रदीप कुमार लामालाई २-१ ले हराउँदै क्वाटरफाइनलको यात्रा तय गरे।

उनले १३औं वरीयताका रमेश अधिकारीसँग खेल्नेछन्। रमेशले पहिलो चरणमा अप्रत्याशित नतिजा निकाल्ने क्रममा छैटौं वरीयताका सञ्जय लामालाई ३-१ ले माथ दिए।

गत सिजनको उत्कृष्ट १६ प्रोफेसनल गल्फरले प्रतियोगिता भाग लिने भएतापनि चार खेलाडी देश बाहिर रहेकोले उत्कृष्ट २० सम्मका खेलाडीले मौका पाएका हुन्।

पहिलो चरण, क्वार्टरफाइनल, सेमीफाइनल र तेश्रो स्थानका लागि हुने खेल १८ होलको हुनेछ भने फाइनल खेल ३६ होलको प्रतिस्पर्धा हुनेछ।

बुधबार क्वार्टरफाइनल र सेमीफाइनलका खेलहरू हुनेछन्। बिहीबार तेश्रो स्थान र फाइनल खेल खेलिनेछन्। 

सूर्य नेपाल प्रालिको प्रायोजनमा पीजीए नेपालले आयोजना गरेको प्रतियोगिताको कुल पुरस्कार राशि २ लाख ५० हजार रहेको छ। 

विजेता खेलाडीले ६० हजार रुपैयाँ प्राप्त गर्नेछन् भने उपविजेताले ४२ हजार पाउँनेछन्। तेश्रो र चौथो हुने प्रोले क्रमशः ३२ हजार र २४ हजार प्राप्त गर्नेछन्।

क्वार्टरफाइनलमा पराजित हुने चार खेलाडीले समान ११ हजार नगद प्राप्त गर्नेछन् र पहिलो चरणबाट बाहिरिने आठ खेलाडीले समान ६ हजार प्राप्त गर्नेछन्।