सूर्य नेपाल गल्फ टुर २०२२-२३ अन्तर्गत सिजनको तेस्रो प्रतियोगिता सूर्य नेपाल एनपीएजीए म्याच प्लेको उपाधिका लागि दिनेश प्रजापती र रमेश अधिकारीबीच प्रतिष्पर्धा हुनेभएको छ । 

बुधवार रोयल नेपाल गल्फ क्लवको कोर्समा भएको अन्तिम चारको भिडन्तमा १३ औं बरियताका रमेश अधिकारीले १० औं बरियताका भुवनकुमार रोक्कालाई २÷१ ले हराउँदै फाइनलमा स्थान पक्का गरेका थिए । अर्को खेलमा सातौं बरियताका दिनेश प्रजापतीले आठौं बरियताका धनबहादुर थापालाई पनि २-१ ले पछि पार्दै फाइनलमा स्थान बनाएका हुन् । सूर्य नेपाल टुरमा करियरकै पहिलो उपाधि जित्ने दाउमा रहेका दिनेश अब एक कदम टाढा रहेका छन् ।

दिनेश र रमेशले उपाधिका लागि आज बिहीबार ३६ होलमा गर्नेछन् भने धन र भुवनले तेस्रो स्थानका लागि १८ होलका लागि प्रतिष्पर्धा गर्नेछन् । यसअघि बुधवार नै भएको अर्को क्वाटरफाइनल खेलमा खेलाडी शुक्रबहादुर राई, दोस्रो बरियताका भुवन नगरकोटी, तेस्रो बरियताका जयराम श्रेष्ठ र पाँचौ बरियताका रवि खड्का पराजित भएका थिए ।

शुक्रलाई बरियताको १० औं स्थानमा रहेका भुवनकुमार रोक्काले ३-१ ले पराजित गरे । अर्को क्वाटरफाइनलमा धनबहादुर थापाले भुवनलाई ३-२ ले हराउँदै अन्तिम चारमा स्थान बनाएका थिए । यसैगरी दिनेश प्रजापतीले तेस्रो बरियताका जयराम श्रेष्ठलाई ३-२ ले स्तब्ध बनाए । पूर्व नम्बर एक खेलाडी रवि खड्कालाई १३ औँ बरियताका रमेश अधिकारीले पराजित गरे । रमेशले पाँचौं बरियताका रविलाई ३-२ को नतिजामा पराजित गरेका हुन् ।

गत सिजनको उत्कृष्ट १६ प्रोफेसनल गल्फरले प्रतियोगितामा भाग लिने भए पनि चार खेलाडी देश बाहिर रहेकोले उत्कृष्ट २० सम्मका खेलाडीले मौका पाएका हुन् । सूर्य नेपाल प्रालिको प्रायोजनमा पीजीए नेपालले आयोजना गरेको प्रतियोगितामा सबै स्पर्धाका विजेताले कुल २ लाख ५० हजार रुपैयाँ राशिको पुरस्कार पाउनेछन् ।