कैलालीको धनगढीमा देशकै सर्वाधिक धनराशीको धर्मदेव पशुपति स्मृति प्रथम खुल्ला राष्ट्रिय ब्याडमिन्टन प्रतियोगिता २०७९ हुनेभएको छ । पुलिस पब्लिक ब्याडमिन्टन क्लबको आयोजनामा फागुन ११ गतेदेखि १३ गतेसम्म प्रतियोगिता हुने भएको हो । 

प्रदेश प्रहरी कार्यालयको ब्याडमिन्टन हलमा फागुन ११, १२ र १३ गते प्रतियोगिता हुने बिहीबार पत्रकार सम्मेलन गरी जानकारी दिइएको छ । देशभरमै सर्वाधिक पुरस्कार राशीको ब्याडमिन्टन प्रतियोगिता प्रदेशमा सञ्चालन गर्न लागेको संयोजक मेम्बर सिंहले जानकारी दिए । प्रतियोगितामा  खुल्ला पुरुष डबल, पुरुष तर्फ नै ४५ बर्ष माथिका भेट्रान र ५५ बर्षमाथिका भेट्रान गरी तीन ईभेन्टमा प्रतियोगिता सञ्चालन गरिने संयोजक सिंहले बताए ।

खुल्ला पुरुष डबलमा प्रथमलाई १ लाख २१ हजार, द्वितियलाई ७१ हजार र तृतीयलाई ५१ हजार रकम पुरस्कारसँगै मेडल तथा ट्रफी प्रदान गरिनेछ । ४५ बर्षमाथिको भेट्रानमा प्रथमलाई ५१ हजार, द्वितियलाई ३१ हजार र तृतीयलाई २१ हजार नगद प्रदान गरिनेछ । त्यस्तै, ५५ बर्षमाथिको भेट्रानमा प्रथमलाई ३१ हजार, द्वितियलाई २१ हजार र तृतीयलाई ११ हजार नगद सहित ट्रफी, मेडल प्रदान गरिने संयोजक सिंहले बताए । 

प्रतियोगिताको जम्मा पुरस्कार राशी चार लाख नौ हजार हुनेछ । प्रतियोगितामा फागुन ९ गतेभित्र नाम दर्ता गरिने र १० गते टाईसिट निकालिने आयोजकले जनाएको छ ।