नेकपा एमालेका अध्यक्ष केपी शर्मा ओली प्रधानमन्त्री पुष्पकमल दाहाल 'प्रचण्ड'लाई भेट्न बालुवाटार पुगेका छन् ।

राष्ट्रपतिको निर्वाचन, रवि लामिछानेको नारिकताका सम्बन्धमा सर्वोच्चको आदेशपछिको परिस्थिति लगायतका विषयमा छलफलका लागि ओली बालुवाटार पुगेको स्रोतले जानकारी दियो ।

सत्ता साझेदार रास्वपाका तर्फबाट उपप्रधान तथा गृहमन्त्री बनेका रविको नागरिकता शुक्रवार सर्वोच्चले अवैध ठहर गरिदिएपछि उनले राजीनामा दिएका थिए ।

रविले आइतवार नागरिकता पुन:प्राप्ति गरिसकेका छन् । स्रोतका अनुसार ओलीले रविलाई तुरुन्त गृहमन्त्रीमा पुनर्बहाली गर्न आग्रह गरेका छन् ।

सांसद नरहे पनि ६ महिनाका लागि मन्त्री बन्न सक्ने संवैधानिक व्यवस्था छ । यसरी मन्त्री बनेको व्यक्ति ६ महिनाभित्र संघीय संसद्को सदस्य बनिसक्नुपर्छ ।