अभिनेत्री स्वस्तिमा खड्काले चलचित्रमा आफूलाई समय भन्दा क्यारेक्टरले अर्थ राख्ने बताएकी छिन् । 

आइतवार चलचित्र ‘पशुपति प्रसाद २ : भष्मे डन’को घोषणा कार्यक्रममा बोल्दै उनले क्यारेक्टर बलियो भए आफू जति सानो भूमिकामा पनि अभिनय गर्ने बताएकी हुन् । 

‘५ मिनेट, २ मिनेट वा १ मिनेटको रोल भएपनि त्यसले फरक पार्दैन्’ उनले भनिन् – ‘त्यो क्यारेक्टर कत्तिको बलियो छ भन्ने कुराले अर्थ राख्छ ।’

‘पशुपति प्रसाद’मा अभिनेत्री वर्षा सिवाकोटी छोटो भूमिकामा प्रस्तुत थिइन् । यसको सिक्वेल ‘भष्मे डन’मा पनि कतै स्वस्तिमा छोटै भूमिकामा मात्र प्रस्तुत हुन लागेकी हुन् कि भन्ने सञ्चारकर्मीहरूको जिज्ञासामा उनले उक्त कुरा बताएकी हुन् ।

आजसम्मको चलचित्र करिअरमा आफूले सधै रोल कति मिनेटको हो भन्दापनि कति सशक्त छ भन्ने कुरामा ध्यान दिँदै आएको अभिनेत्री खड्काले बताइन् । 

उनले भनिन्, ‘५ मिनेटमा आफूले कत्तिको सशक्त काम गर्न सक्छु भन्ने कुराले चाहिँ अर्थ राख्छ ।’ 

उनले पछिल्लो समय आफू चलचित्रमा केन्द्रीय भूमिकामा काम गर्न थालेपछि धेरै निर्माताले सानो भूमिकामा अफर गर्न छाडेको समेत गुनासो गरिन् । ‘उहाँहरूलाई मैले सानो रोलमा काम गर्दिनँ होला भन्ने लागेको होला । तर, म २ मिनेटको भूमिकाको प्रतीक्षामा छु’– उनले भनिन् ।

खगेन्द्र लामिछानेको लेखन एवं निर्माण, दीपेन्द्र के. खनालको निर्देशनमा बन्न लागेको ‘पशुपति प्रसाद २ : भष्मे डन’मा विपिन कार्की, स्वस्तिमा खड्का, सौगात मल्ल, रविन्द्र सिंह बानिया लगायतको अभिनय रहनेछ । 
चलचित्र घोषणा कार्यक्रममा अभिनेत्री खड्काले आफू एक्लै हल गएर ‘पशुपति प्रसाद’ हेरेको समेत स्मरण गरिन् ।

उनले दर्शकको मनमा बसेको चलचित्रको फेन्चाइजमा काम गर्न पाउँदा खुशी लागेको बताइन् । 

फागुनदेखि छायांकनमा जाने ‘पशुपति प्रसाद २ : भष्मे डन’ आउँदो वर्षको दशैँको फूलपातीमा प्रदर्शनमा आउने घोषणा गरिएको छ ।