सत्तारूढ दल नेकपा (एमाले) का नेता तथा पूर्वमन्त्री शेरबहादुर तमाङले सरकार गठनपूर्वको सहमतिअनुसार एमालेका उम्मेदवार नै राष्ट्रपति बन्ने दावी गरेका छन् । सोमबार आयोजित साक्षात्कार कार्यक्रममा उनले त्यस्तो दावी गरेका हुन् ।  

‘सरकार गठनको पहल कदमीअनुसार भएको सहमतिमा अब एउटा काम बाँकी छ,  राष्ट्रपति र उपराष्ट्रपतिको निर्वाचन । राष्ट्रपतिको निर्वाचनमा एमालेले प्रस्ताव गरेको पात्र नै राष्ट्रपति बन्नेछन्, त्यसमा माओवादी केन्द्रका अध्यक्ष पुष्पकमल दाहाल ‘प्रचण्ड’ले समर्थन गर्ने छन्’ उनले भने । 

नेपाली कांग्रेस सरकारलाई समर्थन दिएको पार्टी भएकाले  सरकारभित्र सहभागी हुन्छौं भन्ने हो भने राष्ट्रिय सहमतिका लागि स्वीकार्छौ उनले भने । शान्ति प्रक्रियाको काम पनि टुंग्याउन बाँकी रहेकाले त्यसमा सरकारले काम गर्ने उनले बताए । ‘एमाले राष्ट्रिय सहमतिका लागि सकारात्मक छ । तर पदको बाँडफाडको आधारमा होइन’ उनले भने ।

एजेण्डाको आधारमा कांग्रेसलाई पनि लिएर राष्ट्रिय सहमति खोज्न एमाले सकारात्मक रहेको उनको भनाइ छ । पदीय भागबण्डाको आधारमा राष्ट्रिय सहमतिको कुनै प्रयास नहुने उनले बताए । 

तामाङले राष्ट्रिय स्वतन्त्र पार्टीका सभापति रबि लामिछानेलाई पुनः गृहमन्त्री बनाउन एमालेको कुनै दवाब नरहेको दाबी गरे । चितवन–२ मा उपनिर्वाचन हुँदैगर्दा रबिलाई सत्ता गठबन्धन दलले सहयोग गर्ने उनले बताए । रबिको नागरिकता विवादसँगै रहेको राहदानी  विवादमा  कानुनबमोजिम छानबिन हुन आवश्यक रहेको उनको भनाइ छ । कुनै व्यक्तिमाथि कानूनरु रूपमा प्रश्न उठेपछि निष्पक्ष रूपमा छानबिन हुनुपर्ने तामाङले बताए ।